Jornalista Max Stahl (hatais kalsa badak) ho nia kamera leno hela ba alvu. Imajen/Facebook: Kristy Sword Gusmão

DILI, 16 dezembru 2021 (TATOLI)— Komandu FALINTIL-Forsa Defeza Timor-Leste, liuhosi Xefe Estadu Maiór Jenerál F-FDTL, Tenente Jenerál Lere Anan Timur, akompaña ho estrutura militár fó omenajen ikus ba saudozu Max Stahl nia ahu-kdesan.

“Ami mai fó ultimu omenajen ba eroi Timor-Leste Max Stahl, biar ema estrajeiru, maibé hadomi Timór liu-fali timór-oan balun tanba ida ne’e maka ita tenke orgullu no valoriza,” Tenente Jenerál Lere, hateten ba jornalista sira hafoin ramata presta omenajen ba Saudozu Max Stahl iha Sentru Audivisuál Max Sthal (CAMSTL, sigla portugés), Benfica, kinta ne’e.

Tuir Lere, Saudozu Max Stahl nuudar jornalista ne’ebé maka profisionál no berani hodi fó aan ba ba Timor-Leste nia ukun rasik aan liuhsoi halo filmajen ba masakre Santa Cruz iha 12 novembru 1991.

Tanente Jenerál Lere Anan Timur. Imajen TATOLI/Egas Cristovão.

“Ha’u hasoru malu ho nia sempre iha koriozidade atu hatene situsaun Timor-Leste, entaun nia bele mate, maibé nia kontribuisaun ba rai ne’e ita hanoin nafatin. Tanba ha’u iha relasaun diak tebtebes ho nia (Max Stahl),” Lere afirma.

Tenente Jenerál ne’e relembra, iha rezisténsia nia laran rona de’it nia naran, maibé la hasoru nia direta.

“Ha’u defisil hasoru jornalista tanba inimigu nunka husik ha’u no hau mos preokupa ba jornalista sira nian vida.  Ha’u iha ai-laran so hasoru malu ho jornalista nain nain tolu hosi Japaun no Alemaña, mas Saudozu Max Sthal nunka hasoru ha’u, mas ha’u rona nia naran,” Lere lembra.

Estadu Timor-Leste iha sentidu responsablidade hodi ko’alia ho Max Stahl nian família atubele lori ninia sinzas mai haloot iha Santa Cruz-Dili.

“Max Stahl la’ós timór-oan, maibe hadomi Timór liu fali timór-oan balun ne’e lisaun boot ida. Se ema rai seluk hadomi ita nia rai tanba saida maka ita rai-nain labele hadomi ita nian rai,” Lere agradese.

Nune’e, Lere Anan Timur husu ba jornalista timór-oan sira atu hakat tuir ain-fatin Max Stahl nian tanba jornalista sira nian papél no dever importante iha prosesu demokrasia.

“Jornalista mak fahe informasaun atu halibur ita, maibé la’os fahe informasaun atu haketak ka hafahe,” Lere fó hanoin.

Tuir ajenda, sesta (17/12), dadersan, sei lori Saudozu Max Stahl nia ahu-kdesan sai hosi CAMSTL ba Motael, hodi halo misa ikus ne’ebé prezide hosi Arsebispu Arkidioseze Metropilitana Dili, Don Virgílio do Carmo da Silva, hafoin misa sei la’o ain ba to’o iha semitériu Santa Cruz hodi haloot.

Sinza Saudozu Max Stahl sei haloot iha simitériu santa cruz, ne’ebé hanesan fatin akontese Masakre Santa Cruz 1991, no fatin hakoi ka subar rollu ne’ebé mak nia hasai foto no video, atu Militár Indonéziu labele foti.

Jornalista : Natalino Costa

Editór       : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here