Vise Primeiru Ministru no Ministru Planu no Ordenamentu, José Maria dos Reis, asina plaka Uma Kbiit Laek, iha suku Lahomea, postu administrativu Maliana, munisípiu Bobonaro. Imajen Tatoli/Sérgio da Cruz.

BOBONARO, 16 dezembru 2021 (TATOLI) – Vise Primeiru Ministru (VPM) no Ministru Planu no Ordenamentu (MPO), José Maria dos Reis, kinta ne’e inaugura Uma kbiit Laek (UKL), unidade tolu iha suku Lahomea, postu administrativu Maliana, munisípiu Bobonaro.

José Maria dos Reis, hateten, planu governu harii uma kbiit laek ne’e atu dignifika povu ne’ebé vulnerável liu iha aspetu sosiál no ekonómiku.

Nune’e mós  programa ne’e liga mós ho kompromisu ne’ebé fundadór nasaun sira mehi iha prosesu luta ba libertasaun nasionál durante tinan 24 nia laran katak bainhira Timor-Leste konkista ona independénsia povu hotu tenke moris goja ho osan fundu mina-rai.

“Ita hotu-hotu partisipa iha prosesu luta libertasaun nasionál, tanba ne’e governu iha obrigasaun atu hadi’a povu ida-ne’e nia kondisaun moris hanesan estrada, bee, irrigasaun no uma, maibé mós ida-ne’e governu la halo diskriminasaun ba povu. Ne’e governu halo tuir kbiit ne’ebé iha, fó pasu ba oin ho neineik no ita halo uma biebeik,” Vise Primeiru Ministru hateten.

Nia esplika, programa uma kbit laek ne’e VIII Governu Konstitusionál halo atu dudu tán prosesu dezenvolvimentu la’o di’akliu no sentraliza ba povu ne’ebé presiza duni hetan apoia hosi governu.

“Ha’u husu ba benefisiáriu sira atu tau matan ba uma ne’e, atu bele dura, ita hela tenke halo manutensaun no tau matan,” governante ne’e husu.

Vise-Ministru Administrasaun Estatal, Lino Torrezão, hataten, tinan ne’e iha territóriu nasionál Governu konstrui uma unidade tolu kada suku, maibé haree ba realidade konkreta povu barak mak sei presiza uma dignu, tanba ne’e governu planeia tinan oin sei aumenta tán unidade sia (9) to’o 12 kada suku, nune’e bele hakmaan povu nia sofrimentu.

“Foin lalais ne’e iha orsamentu jeral estadu, osan ne’e tún tiha, maibé esforsu ne’ebé maka Prezidente Repúblika atu halo komunikasaun ho governu no parlamentu atubele aumenta uma kbiit laek, ne’ebe esforsu governu atu kria kondisaun ba nia povu sei la para de’it iha-ne’e,” nia katak.

Nia fó-sai katak, atu aumenta uma kbiit laek iha territóriu nasionál, Governu planeia atu hasa’e insentivu ba Ekipa Jestaun suku sira (EJS), atubele motiva sira halo supervizaun badinas liután.

Biban ne’e, benifisiáriu Martinho Bue-Mau ho matan-been  agradese ba estadu ne’ebe kore ona sira-nia terus no susar liuhosi harii uma dignu.

“Ami kbiit laek, uma la di’ak, terus iha udan laran loron laran no anin kalan loron, ohin ita-nia governu ida-ne’e lori naroman ida mai ami, ne’e ami sente hanesan mehi de’it, ne’e duni ami sente kontente no fó obrigadu barak,” nia ko’alia ho tanis.

Entretantu, totál orsamentu ne’ebé governu transfere ba konta bankária suku Lahomea hamutuk $45,900.00.

Jornalista         : Sérgio da Cruz

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here