Jornalista Max Stahl (hatais kalsa badak) ho nia kamera leno hela ba alvu. Imajen/Facebook: Kristy Sword Gusmão

DILI, 16 dezembru 2021 (TATOLI)— Prezidente Konsellu Imprensa (CI, sigla portugés), Virgílio da Silva Guterres, husu ba jornalista timór ona sira atu banati Saudozu Max Stahl.

“Ita jornalista-sira atu halo tuir Max Stahl, tenke sai ema ne’ebé aten-berani, kompromisu no étiku sai xave ba jornalizmu. Alende ida ne’e mensajen ne’ebé Max husik mai ita mak sai jornalista la’ós hosi kartaun de’it, maibé tenke mós ho kurasaun ka fuan,” Prezidente CI ne’e hateteen ba  Agência TATOLI, hafoin presta omenajen ba Saudozu Max Sthal iha Sentru Adivisuál Max Stahl (CAMSTL), Benfika Sport-Center , kinta ne’e.

Prezidente Konsellu Imprensa, Virgílio da Silva Guterres. Imajen Tatoli/Francisco Sony

Prezidente Virgílio mós husu Governu liuhosi Ministériu Administrasaun Estál (MAE), atu indetifika diresaun ka Estrada (rua) iha Dili hodi tau naran Max Stahl tanba hanesan jornalista no eroi..

“Ha’u hanoin Ministeriu Administrasaun Estatál presiza indetifika rua ka diresaun Estrada hanesan iha Santa Cruz bele tau naran Max Stahl,” nia sujere.

KI mós husu Governu atu prezerva produtu sira mak Max Stahl prod’us tanba balun sai ona patrimóniu UNESCO nian liuliu transforma CMASTL sai institutu ida, nune’e ema hosi nasaun seluk mai halo estudu iha ne’e.

TLPU-AJTL husu jornalista labele rende aprende

Iha biban hanesan, Prezidente Timor-Leste Press Union Timor-Leste (TLPU), Candido Alves, husu ba jornalista timór-oan labele rende hodi aprende,  nune’e loron ruuma bele hakat tuir Saudozu Max Stahl nia ain-fatin.

Prezidente eleitu TLPU, Candido Alves. Imajen TATOLI/Francisco Sony

Saudozu Max Sthal amigu bo’ot ba jornalista no ba povu Timor-Leste liuhosi nia obra filmajen ne’ebé iha 12 novembru 1991 hodi hafanu mundu katak iha Timor militár Indonézia halo violasaun diretu umanu.

“Nune’e, ha’u hanoin ba ita jornalista bele foti memoria no lisaun ida ne’e. hodi motiva ita hanesan jornalista hodi hakat tuir maun Max nia ain-fatin,” Prezidente Candido afirma.

Tuir líder TLPU ne’e, Saudozu Max Stahl nia isin bele mate, maibé nia espíritu no memoria hela nafatin iha timór-oan nia fuan.

Prezidente Asosiasaun Jornalista Timor-Lorosa’e (AJTL), Zevonia Veira. Imajen Tatoli/Francisco Sony

Alende ne’e, Prezidente Asosiasaun Jornalista Timor-Leste (AJTL), Zevonia Vieira, husu mós ba jornalista sira banati tuir memoria ne’ebé saudozu Max Stahl

“Ita jornalista presiza banati maun Max Stahl liuliu ho aten-berani fó espasu ba ema sira ne’ebé lian laiha atu hato’o sira nian preokupasaun no kontinua luta ba injustiza ne’ebé maka akontese iha Timór no mós lalika ta’uk atu fó sai lia loos iha prosesu dezenvolvimentu,” nia afirma.

 Jornalista : Natalino Costa

Editór        : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here