Jornalista Agência TATOLI, Filomeno Martins halo entrevista eskluziva ho Espoza Saudozu Max Stahl, Ingrid Bucens, iha edifísiu AMRT, sesta (16/12). Imajen TATOLI/Anito Soares

DILI, 16 dezembru 2021 (TATOLI)—“Ami agradese tebes ba domin ne’ebé ami simu ona.”

Liafuan badak ne’e, Saudozu Max Stahl nia espoza, Ingrid Bucens, hato’o ba jornalista Agência TATOLI iha edifísiu Arkivu no Múzeu Rezisténsia Timor-Leste (AMRT), sesta ne’e.

“Ami agradese tebes ba ema hotu ne’ebé envolve ona iha organizasaun organizadora hodi komemora (simu ahu-kdesan no presta omenajen) horiseik, ohin no aban. Ami agradese tebes ba faktu katak fó lisensa hodi lori ahu-kdesan Max nian ba semitériu Santa Cruz,” Ingrid Bucens hato’o ho matan-been.

Notísia relevante: Espoza Max Stahl husu Governu transforma CAMSTL sai institutu públiku

Triste. Neon susar. Matan-been nakonu hakonu iha oklu mutin. Matan-been habokon hasan. Jornalista sira sai sasin. Iha edifísiu AMRT.

Maski nune’e, Espoza Jornalista Britániku, Max Stahl, ne’ebé grava Masakre Santa Cruz 12 novembru 1991, koko hakbiit-an ho korajen, hodi hatan pergunta jornalista sira.

“Ami la espera apoiu orsamentu ruma hosi Governu Timor-Leste. Maibé, karik iha apoiu ruma di’ak liu apoiu ne’e tenke ba Centro Audiovizual Max Stahl Timor-Lete (CAMSTL) de’it, la’ós ba ami,” Ingrid Bucens, inan ba oan na’in-haat ne’e kontinua dada-lia.

“Hanesan família, agradese tebes bele rekoñese hanesan timor-oan,” Espoza Max Stahl espresa.

Iha lorokraik, oras relójiu hatudu tuku 19h07. Iha ai-funan omenajen ne’ebé mai hosi entidade Estadu, sívil, jornalista no komunidade ba Saudozu. Iha mahon AMRT nia okos. Rai nakaras daudaun. Anin malirin huu neik ba neik.

Entre matan-been ho korajen, Espoza Saudozu Max Stahl nafatin espresa nia sentimentu.

“Ha’u fó obrigadu barak  ba ema hotu ne’ebé simu ona ami. Ha’u labele temi naran, maibé ba veteranu sira, Komité 12 Novembru, Governu, Ramos Horta, grupu no individuál barak. Obrigadu ba Timór no timor-oan sira hodi fó Timór hanesan nia uma. No, agora nia (Saudozu) iha uma. Nia kontente bele simu hosi timor-oan sira no ami hadomi tebes,” nia hato’o.

Sai eransa

Iha biban ne’e, Espoza Saudozu Max Stahl haktuir kona-ba saida mak saudozu hato’o hela ba família no ba nia nu’udar kaben.

Hanesan família, sira apoiu saida de’it mak ema atu halo hodi sai eransa .

“Maibé, eransa loloos ne’ebé Max Stahl hosik hela mak ninia intituisaun ne’ebé nia dezenvolve ona liuhosi apoiu hosi timor-oan sira mak CAMSTL. Ida ne’e deit mak nia hakarak,” Ingrid konta tuir.

Espoza Saudozu Max Stahl haktuir katak durante ne’e hetan mensajen balun husi Prezidente Repúblika (PR), Primeiru-Ministru (PM), Premiadu Novel da Paz, José Ramos Horta no seluktan katak sei tau-matan Saudozu nia oan sira. Saudozu simu ona mensajen ida-ne’e.

“Ha’u laiha mensajen ruma hodi halo diskusaun ba nia desizaun, tanba durante nia moras labele halo komunikasaun tanba kondisaun moras. Maibé, nia kontente bele hola parte iha Timor-Leste,” nia hateten.

Bainhira husu Espoza Saudozu Max Stahl nia hanoin kona-ba oinsá nia ho oan sira-nia rezidénsia, nia hatan katak desizaun ida-ne’ebé difisil tebes.

“Labarik sira hela iha Timor-Leste dezde sira sei fulan-rua no Leo agora tinan 15, no ita hosik Timor-Leste iha marsu bainhira COVID-19 iha. Hasoru difikuldade kona-ba movimentu bainhira Max atu ba halo medical checkup (konsulta médika)”.

“Maibé triste tebes depois fulan barak, nia nafatin moras kankru. Durante tempu ne’e, labarik sira ba eskola nune’e iha tempu ne’ebá sira iha Austrália, nune’e ami deside katak importante tebes atu labele troka ba mai nune’e sira sei hela iha Austrália iha tinan barak,” Saudozu Max Stahl nia kaben haktuir.

Tuir nia katak halo ona kompromisu kona-ba futuru oan sira nian tanba nia envolve servisu iha saúde labarik no ospitál.

“Ha’u espera ho ha’u-nia serbisu ba labarik nia moris di’ak liu iha Timor-Leste,” nia tenik.

Matan nakonu. Neon susar. Ingrid Bucens hamonu matan been bainhra jornalista Agência TATOLI dada-lia ho nia kona-ba nia mensajen ba Timor-Leste.

Espoza saudozu Max Stahl, Ingrid Bucens hateten, nia parte ho família senti orgullu sai sidadaun Timor-Leste, maski Saudozu Max Stalh rasik lakon ona vida.

Nia dehan, família Saudozu Max Stahl sente kontente no orgullu sai sidadaun Timor-Leste maibé sira la husu apoiu finanseiru hosi Governu no durante ne’e Saudozu ladún ko’alia ba família tanba nia kondisaun

“Ami laiha liafuan ruma atu hato’o ba Governu no ami la husu osan hosi Governu,” Ingrid Bucens hateten

Jornalista : Arminda Fonseca 

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here