Vise-Primeiru Ministru no Ministru Planu no Ordenamentu, José Maria dos Reis. Imajen Mídia PR.

BOBONARO, 15 dezembru 2021 (TATOLI) – Vise-Primeiru Ministru no Ministru Planu no Ordenamentu, José Maria dos Reis, fó-sai katak, Governu sei halo reabilitasaun ba estrada rural ho kilómetru 50,7 iha munisípiu Bobonaro iha tinan 2022.

“Bazea ba previzaun Governu nian, tinan 2022 sei implementa projetu iha munisípiu Bobonaro reablitasaun estrada rurál ho kilómteru 50,7, estrada munisipál hanesan Atabae, Maliana ho Bobonaro,”José koa’lia asuntu ne’e bainhira akompaña Prezidente Repúblika, Francisco Guterres ‘Lú Olo’ hala’o diálogu ho komunidade Bobonaro, iha Jináziu Maliana, kuarta ne’e.

Nune’e mós estrada nasionál Oe-leu, Lourba, Zulo no Fatuleto ho kilómetru 26, estrada urbana iha Maliana ho kilómetru 23 inklui kontrusaun ponte iha Mota-ain no estrada Batugade.

Iha parte seluk, nia fó-sai katak, projetu agrikultura nian sei konstrui irrigasaun Maliana II, konstrusaun moru zona agríkola irrigasaun Halekou, Ritabou no manutenesaun sistema irrigasaun Tebabui no Hauba.

Iha setór saúde, konstrui sala pediatria feto no mane iha Hospital Referál Maliana (HRM), konstrusaun banku de sangue no armazein SAMES Bobonaro.

Iha setór edukasaun sei konstrui sala aula iha  Atabae no Cailaco, enkuantu iha setór komérsiu konstrusaun merkadu fronteira Mota-Ain, Batugade, armazein tránzitu iha Mota-ain no konstrusaun Alfándega iha Tunubibi, Maliana.

Setór Turizmu sei konstrui Jardín Nino Conis Santana iha foho Loe-Lacu, inklui asesu estrada. Enkuantu iha setor defeza no seguransa sei konstrui postu Unidade Patrullamentu Fronteira (UPF), iha Mota-ain no Tunubibi.

Nune’e mós edifísiu imigrasaun iha Tunubibi inklui sentru detensaun no konstrui baze foun kompañia F-FDTL iha área Damlaran, postu administrativu Atabae.

Vise-Primeiru Ministru fó-sai prioridade hirak-ne’e hodi responde preokupasaun Prezidente Autoridade Munisípiu Bobonaro, Ernesto de Oliveira Barreto, rekomenda pontu balun ba Governu Sentrál durante halo diálogu ho prezidente Repúblika Francisco Guterres ‘Lú Olo’.

“Rekomenda ba Governu Sentral atu fó prioridade prinsipál alokasaun orsamentu ba infreastrutura setór produtivu sira iha nível munisípal hanesan agrikultura obra públika, edukasaun no seluk tan,” nia rekomenda.

Rekomenda mós ba Governu Sentrál atu tau atensaun másimu ba servisu delegasaun territoriál sira-nia kondisaun serbisu ho ekipamentu movél no imovél tuir idak-idak nia área no responsável.

Relasiona ho lei podér lokál no lei eleisaun munisípal ne’ebé mak hetan ona promulgasaun husi Prezidente Repúblika husu atu governu tenke foka iha programa dezenolvimentu rekursu umanu iha nível munisipál iha territoriu nasionál.

Dezáfiu ne’ebé adminiatrasaun munisipál Bobonaro mak rekursu umanu ne’ebé mínimu inklui mós iha serbisu administrasaun postu administrativu sira.

Nune’e mós parte servisu obra públika laiha ekipamentu pezadu, transporte mínimu liu, servisu bombeiru menus fasilidade infraestrutura no ekipamentu, menus formasaun ba ajente operasionál sira no sistema orsamentu sentralizadu.

Nune’e, Vise-Primeiru Ministru no Ministru Planu no Ordenamentu ne’e sei aprezenta rekomendasaun hirak-ne’e ba reuniaun Konsellu Ministru.

Autoridade Bobonaro iha postu administrativu neen, suku 50, aldeia 194 ho totál populasaun 97,762 komposta hosi mane 48,875 no feto 48,887 ho totál uma-kain 17,675.

Notisia relevante: Prezidente Repúblika ‘sasin’ ba promesa MOP hadi’a estrada Bobonaro-Lolotoe

Jornalista         : Sérgio da Cruz

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here