Responsável verifikasaun dadus veteranu, postu administrativu Atabae, Alexandrino Vicente. Imajen mídia PR.

BOBONARO, 15 dezembru 2021 (TATOLI) – Responsável verifikasaun dadus veteranu, postu administrativu Atabae, reprezenta mós família mártir, Alexandrino Vicente, husu Governu haloot restu mortál eroi pátria ne’ebé tau hela iha osuáriu suku Odomau, postu administrativu Maliana, munisípiu Bobonaro.

Nia hato’o asuntu ne’e ba Ministru Asuntu Kombatente Libertasaun Nasionál, Júlio Sarmento ‘Meta Malik’, durante diálogu ho Prezidente Repúblika, Francisco Guterres ‘Lú Olo, iha Jináziu Maliana, kuarta ne’e.

“Ami rekolla ona restu mortál lubuk ida tau iha osuáriu Maliana, maibé agora kaixaun sira komesa dodok, kalen mós komesa kuak, ita lori mai atu prezerva sira ka atu haterus sira, razaun ida-ne’e mak ami husu Governu atu haloot,” nia rekomenda.

Nune’e mós husu ba Governu atu tau matan ba família oan-kiak mártir sira, nune’e bele hetan oportunidade asesu edukasaun no saúde gratuita.

Entretantu restu mortál iha osuáriu Maliana ne’ebé rekola iha tinan 2014-2015 hamutuk 578. Hosi númeru ne’e 279 mai hosi postu administrativu Atabae, Balibo no Cailaco no 299 mai hosi postu administrativu Maliana, Bobonaro no Lolotoe, ne’ebé mate hosi tinan 1975 to’o 1999.

Hatán ba preokupasaun ne’e, Ministru Asuntu Kombatente Libertasaun Nasionál, Júlio Sarmento Meta Mali, hateten, durante ne’e Governu iha planu atu haloot restu mortál hirak-ne’e, maibé situasaun polítika no Covid-19 la konsege  prevee orsamentu.

“Ha’u atu hateten orsamentu jeral estadu tinan kotuk, ha’u sekretáriu estadu hodi muda sai konseitu atu halo jardín eroi, sai hosi kapitál dezenvolvimentu mai tranferénsia públika atu ita bele halo planu ne’e,” nia dehan.

Governante ne’e hatutan, iha tinan 2022 governu sei fo prioridade ba veteranu nia oan atu hetan bolsu estudu nune’e iha kada munisípi ema na’in-100.

Jornalista         : Sérgio da Cruz

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here