Komandante Postu Tátiku Ezersisiu Cobra 21-2 atuál komandante Aereu F-FDTL, Tenente Koronel Helder da Costa. Imajen Tatoli/Francisco Sony.

BOBONARO, 15 dezembru 2021 (TATOLI) – Komandu FALINTIL-Forsa Defeza Timor-Leste (F-FDTL) liuhosi Departamentu Saúde Militár, kuarta ne’e finaliza ona tratamentu saúde gratuita ba komunidade sira iha munisípiu Bobonaro, postu adminitrativu tolu hanesan Maliana Vila, Balibo no Atabae. 

Komandante Postu Tátika Ezersísiu Cobra 21-2 atuál komandante Aeréu F-FDTL, Tenente Koronél, Helder da Costa,  hateten, F-FDTL hala’o tratamentu saúde ida-ne’e hanesan parte ezersisíu iha Maliana Vila,  Balibo to’o Atabe nian.

Tratamentu saúde iha Suku Aidabaleten hanesan última iha atividade tratamentu saúde militár ba komunidade sira munisípiu Bobonaro iha ámbitu ezersísiu Cobra21-2 nian.

“Tratamentu hanesan parte ezersísiu ida ba ita-nia médiku militár atu familiariza área no apoiu  populasaun iha atividade realasaun sivíl militár CIMIC nian,” Tenente Koronél Helder da Costa, ko’alia iha ámbitu enseramentu tratamentu saúde iha aldeia Aidabas Leten, Atabae.

Iha atividade tratamentu saúde ne’e, Médiku Militár hala’o koordenasaun mós ho Ministériu Saúde hodi bele hetan ai-moruk sira atubele konsulta ba komunidade sira iha área remota.

“Ai-moruk ne’ebé fó ba komunidade sira tuir saida maka Ministériu Saúde iha no ita la fó ai-moruk foun ruma. Tanba antes realiza tratamentu ida-ne’e, ita halo koordenasaun ona ho SAMES no Ministériu Saúde sira fó ba ita-nia Médiku Militár sira”, dehan Komandante Postu Tátiku Ezersísiu Cobra 21-2 atuál komandante Aero F-FDTL, Tenente Koronel, Helder da Costa.

Reprezentante komuidade aldeia Aidabas Leten, Francisca Fontes Leite, kontente tanba F-FDTL ho nia médiku sira to’o ona iha área remota fó tratamentu gratuita ba komunidade.

Komuidade Aldeia Aidabas Leten, Francisca Fontes Leite. Imajen Tatoli/Francisco Sony

“Durante ne’e komunidade hala’o tratamentu ba to’o postu saúde Damlaran ne’ebé dook loos no halo katuas ferik sira labele ba tanba sira la’o labele,” dehan komuidade aldeia Aidabas Lete ne’e.

“Ami komunidade Aidabas Lete iha ona ahi-eletrisidade no estrada maibé bee-moos atu utiliza ba nesesidade loron-loron nian mak laiha. Bainhira atu asesu ba bee-moos tenke la’o to kilómetru 10 mak foin hetan bee-moos,” nia katak.

Postu tratamentu saúde sira-ne’ebé médiku militár F-FDTL hala’o mak hanesan iha Maliana Vila nian iha área Tunubibi, Moleana. Iha postu adimistrativu Balibo hanesan Leolima no iha Atabae nian mak hanesan Aidabaslala, Biamarae, Manduki, Migir, Damlaran no Aidabas Leten.

Jornalista         : Francisco Sony

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here