Atividade sertame nasionál ba da-III, iha Eskola São Miguel, Comoro, kinta (16/12). Imajen/CNC, I.P

DILI, 16 dezembru 2021 (TATOLI)–Estudante na’in-33 hosi Eskola Ensinu Báziku 30 siklu hamutuk 11 iha Dili no munisípiu sira, partisipa atividade sertame nasionál ba da-III, hodi selebra loron Proklamasaun Independénsia ba dala-46.

Diretór Ezekutivu Centro Nacional Chega!, Institutu Públiku (CNC, I.P), Hugo Maria Fernandes, hateten, atividade ne’e ho matéria istória kona-ba edukasaun sidadania no direitu umanu, tanba durante ne’e instituisaun Estadu ne’e distribui ona livru ba eskola sira atu estudante bele hatene didi’ak istória rai-laran.

“Matéria iha livru ne’ebé ita distribui ba eskola sira, sei sai referénsia iha atividade sertame nasionál. Tanba ne’e, eskola sira ne’ebé hetan ona distribuisaun livru hosi ami, ohin partisipa hotu iha sertame nasionál,” Diretór Ezekutivu CNC, I.P, hateten, iha ninia diskursu ne’ebé hato’o, iha Eskola São Miguel, Comoro, kinta ne’e.

Notísia relevante: Selebra ‘Loron Memória’, CNC-estudante sira vizita fatin istóriku iha Covalima

Tuir Responsável sentru ne’e, CNC, I.P no Ministériu Edukasaun, Juventude no Desportu (MEJD) sai ona parseiru desde tinan 2018, ne’ebé kolabora halo atividade edukasaun no avaliasaun rápida hodi integra chega! ba matéria istória, kona-ba edukasaun sidadania no direitu umanu ba nível ensinu báziku terseiru siklu no ensinu sekundáriu jerál.

Aleinde ne’e, parte rua ne’e serbisu besik liu ba eskola sira hodi bele introdús fatin istóriku ba estudante sira iha ámbitu komemorasaun loron istóriku sira.  

Nune’e, iha tinan 2019 to’o 2020, parseiru rua ne’e organiza atividade sertame hodi selebra loron istóriku Konsulta Populár ba dala-20 no loron Proklamasaun Independénsia ba dala-45.

Nune’e, CNC. I.P dezeju atividade sertame ne’e nu’udar kompetisaun ida ho espíritu no esperansa boot, katak saida mak durante ne’e MEJD halo bele sai maneira hodi avalia prontidaun rezisténsia no presisténsia profesór sira atu fó tempu hodi eduka estudante sira.

Iha fain hanesan, Vise-Ministru Edukasaun, Juventude no Desportu, António Guterres, apresia no agradese tanba bele iha nafatin atividade sira hanesan ne’e hodi provoka beibeik movimentasaun estudante sira bele iha koñesimentu ba siénsia.

“Husu ba ema hotu ne’ebé iha responsabilidade ba eventu ne’e, liu-liu ba sira ne’ebé mak hetan delegasaun kompeténsia atu deside rezultadu ba atividade sertame nasionál ne’e, bele deside ho di’ak no loloos atu labele hamosu dezentendimentu. Eventu ne’e la buka sé mak manan ka sé mak lakon, maibé oinsá ita atu prezerva istória sira hodi fó onra ba eroi sira-nia luta,” governante ne’e hameno.

Entretantu eskola ne’ebé partisipa iha eventu ne’e maka hanesan Eskola Ensini Báziku Sentrál (EBC, sigla portugés) São Miguel Arcanjo, EBC Anur, EBC 10 Dezembru, EBC 30 Agostu, EBC Manleuana, EBC Fatumeta, EBC Esperansa da Patria Bekora, EBC Imakulada Conceição Ermera, EBC das Flores Baucau, EBC Ainaro no EBC Santa Cruz Baucau.

Jornalista : Tomé Amado

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here