Jogador Ponta Leste no Assalam hala'o kontra no atake iha jogu jornada da-neen, primeira divizaun LFTL. imajen/LFTL

DILI, 16 dezembru 2021 (TATOLI)– Armada Ponta Leste hanesan mós ekipa ida ne’ebé kandidatu ba kampiaun Liga Futeból Timor-Leste (LFTL) 2021, maibé la konsege tanba Assalam FC hakoi ona nia mehi, hafoin termina jogu ho rezultadu empate 1-1 iha jornada da-neen primeira divizaun ne’ebé hala’o iha Estádiu Munisipál Dili, kinta loraik.

Hosi rezultadu ne’e muda Ponta Leste ba tuur provizoriu iha tabela klasifikasaun ho pontu ualu, maibé susar ona ba nia tanba hela de’it jogu ida hasoru Karketu Dili FC no manán mós nia sei ba kampiaun.

Daudaun, Klube ne’ebe lidera tabela klasifikasaun mak Karketu ho pontu 11, SLB ho pontu hitu, Lalenok ho pontu hitu, Assalam ho pontu neen, sestu Aitana ho pontu haat no ikus liu DIT ho pontu zero.

Jogu entre Ponta Leste no Assalam dirije hosi árbitru Pedro Carvalho, juiz linã primeiru Pedro Braga, liña segundu Paulo da Costa no árbitru rezerva Ricardo Amaral.

Bainhira minutu primeiru, jogadór sira lansa kedan kontra no atake ba malu tuir tékniku no abilidade ekipa ida-idak nian hodi buka hatama golu. Ambisaun ba ekipa rua kuaze hanesan maibé Ponta Leste domina liu bola iha minutu primeiru,  nune’e iha minutu 13 jogadór Mommin Mohammed (8) lansa ona golu primeiru muda rezultadu ba 1-0.

Golu ne’e la hamate esperansa Assalam nian hodi luta makas atu bele responde golu ne’ebé iha ona. Jogadór sira kuaze servisu makas hodi duir bola ba mai iha kampu kuadradu nia laran tuir orientasaun ne’ebé treinadór fó.

Esforsu hirak ne’e fó duni prova ba Assalam tanba,  iha minutu 29 jogadór Augosto da Costa (29) lansa golu ida hodi hatur rezultadu empate  1-1. Golu ne’e hanesan golu ikus iha minutu primeira parte tanba to’o minutu primeira parte termina laiha tan golu ruma mak akontese. 

Dolar ba segunda parte ekipa rua nafatin lansa kontra no atake ba malu maibé laiha mudansa ba jogu,  nune’e to’o minutu normal termina laiha tan golu ruma mak akontese nune’e rezultadu tenke fahe 1-1.

Hosi rezultadu ekipa rua nian, fó biban ba Lalenok, SLB no Karketu atu avansa ba kampiaun tanba pontu ekipa tolu nian la dook malu no sei hela joga dalarua no Karketu hela jogu dala ida.

Jornalista : Hortencio Sanchez

Editór       : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here