DILI, 15 dezembru 2021 (TATOLI)— Eis Primeiru Ministru, Mari Alkatiri, iha kuarta kalan ne’e, presta omenajen ba Saudozu Max Stahl nia Ahu-kdesan iha Sentru Áudiovisual Max Stahl nian, Kolmera-Benfika Dili.
Biban ne’e, Mari Alkatiri, husu ba Timór-oan liuliu joven sira atu respeita no valoriza no banati lisaun hosi Max Stahl nia espirítu hodi kontribui ba ukun rasik an.
“Nia (Max Stahl) ema ne’ebé mai hosi liur, maibé agora ita hotu iha ne’e, pelu menus hatene nia, tanba saida nia mai hosi liur no la’ós timór-oan, maibé nia foti Timor hanesan nia rai, foti povu hanesan nia povu, nia halo buat hotu ba ita. Tanba ne’e ita tenke respeita,”, Eis PM ne’e hateten ba jornalista sira hafoin ramata presta omenajen ba Saudozu Max Stahl.
Notísia Relevante: PN presta omenajen ba Saudozu Max Stahl
Saudozu Max Stahl nu’udar ema Britániku, moris iha loron 06 fulan-dezembru tinan 1954, no husik mundu iha loron 28 fulan-outubru tinan 2021 iha Ospitál Brisbane, Austrália, tanba sofre moras.
“Timór-oan hotu respeita saudozu Max Stahl tanba nia hatudu ona valór istória iha luta libertasaun nasionál. Nune’e ita nian juventude sira tenke foti lisaun hosi nian,” nia fó enkoraja.
Saudozu Max mak halo filmajem kona-ba brutalidade Forsa Indonézia nian iha akontesimentu masakre Santa Cruz, 12 Novembru 1991
“Ha’u so primeiru kontatu ho Max Stahl, bainhira ha’u haree nia filme 12 Novembru 1991 ne’e, Ha’u ba asiste iha televisaun, depois hasoru nia primeira vez iha Portugál,” lideransa nasionál ne’e lembra.
Notísia Relevante: PM Taur: Estadu Timor-Leste fó omenajen ba Saudozu Max Stahl
Jornalista : Natalino Costa
Editór : Florencio Miranda Ximenes