Matebian nia kaben, Maria Gorete, no família, simu mate-isin iha Aeroportu Comoro, kuarta (15/12). Imajen/SEFOPE

DILI, 15 dezembru 2021 (TATOLI)—Mate-isin traballadór timor-oan, Germenino de Deus, to’o ona dadeer kuarta ne’e, iha Aeroportu Internasionál Prezidente Nicolau Lobato, Comoro, ho Aviaun Airnorth.

Mate-isin simu direta hosi Diretór Nasionál Empregu Exteriór (DNEE) Sekretaria Estadu Formasaun Profisionál no Empregu (SEFOPE), Filomeno Soares, no Adidu Traballu Timor-Leste iha Austrália, Tomas de Araújo Guterres, hamutuk ho ekipa, no entrega ona ba família, hodi halo seremónia funerál tuir tradisaun.

“Governu liuhosi SEFOPE hato’o sentidu kondolénsia profunda ba família matebian no enkoraja matebian nia kaben, Maria Gorete, atu forsa nafatin hodi hasoru situasaun difisil,” Diretór Diresaun Nasionál Empregu Exteriór, hateten iha Aeroportu Comoro.

Notísia relevante: Traballadór timor-oan rai-lakan fera iha Austrália hakotu iis

Germenino de Deus hanesan traballadór timor-oan ne’ebé tuir programa Seasonal Worker Programme (SWP) hodi serbisu iha Austrália desde tinan 2019.

Iha loron 23 novembru, akontese insidente rai-lakan no fera traballadór na’in tolu ne’ebé serbisu hela iha terrenu, hodi rezulta Germenino de Deus ho kondisaun grave no interna iha unidade kuidadu intensivu iha ospitál Royal Darwin, no ikus mai hakotu iis iha loron 27 Novembru 2021.

Enkuantu, matebian ninia kolega rua seluk hetan kanek maibé ladun graven no alta kedan iha loron akontesimentu hafoin halo tratamentu.

Jornalista : Antónia Gusmão

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here