Pároku Ave Maria Suai, Sebastião Eugénio da Cruz Correia. Imajen Tatoli /Celestina Teles.

COVALIMA, 15 dezembru 2021 (TATOLI)—Paróku Igreja Ave Maria Suai, Sebastião Eugénio da Cruz Correia informa, loron besik daudaun ona sarani sira atu selebra loron Natal hodi harii prezépiu iha ida-idak nia bairru atu selebra loron Natal maibe harii prezépiu tenke ho domin la’ós fatin atu halo divertimentu.

Atu selebra loron Natal ho nune’e kada tinan sarani sira sempre harii prezépiu hanesan kustume ida, nune’e igreja la bandu maibe harii prezépiu tenke ho sentidu domin no dame la’ós atu halo divertimentui hodi hemu tua no dansa. 

“Ita tenke respeita prezépiu ne’ebè mak ita halo la’ós atu halo festa no fatin atu hemu tua. Se nune’e, di’akliu lalika halo prezépiu. Ita halo prezépiu nu’udar ema fiar-na’in no fatin atu sai orasaun no fatin hasoru malu ho kosok-oan Jesus,” Paróku ne’e hateten ba Agência Tatoli iha nia knar fatin, kuarta ne’e. 

Nai lulik ne’e ba sarani no joven sira bainhira harii prezépiu hanesan fatin atu divertimentu karik, di’akliu lalika gasta tempu no hodi hamoe relijiaun ho hamoe an nu’udar sarani Katólika, no sai traidór ba fiar ne’e rasik.

Selebra Natal hanesan selebra festa ho família hodi simu Jesus Kristu ne’ebé mai lori dame no domin hanesan família boot Kristu nian. 

“Ita selebra Natal, Kristu mai lori dame no domin. Tanba ne’e, harii prezépiu iha bairru hanesan fatin ne’ebè nakonu ho domin atu ita halibur Kristu mai lori domin no dame. Kristu nia festa, domin no dame ni’an, haktuir katak Natal hanesan selebra festa família,” nia hateten. 

Administradór Munisípiu Covalima, Francisco de Andrade reforsa, joven sira selebra loron Natal bele harii prezépiu maibé labele hamosu problema. 

“Ita selebra loron Natal, ita la’ós atu halo problema maibé ita harii prezépiu atu fó dame no domin ba malu,” nia dehan.

Autoridade munisipál ne’e husu sarani no joven sira bainhira harii prezépiu tenke harii dook hosi estrada no prezépiu fatin lábele sai fali fatin atu hemu tua.

“Harii prezépiu atu selebra Jesus nia moris, la’ós atu hamosu konflitu,” nia esplika.

Jornalista : Celestina Teles

Editór       : Cáncio ximenes 

PUBLISIDADEiklan

HAKEREK NO HATÁN

Please enter your comment!
Please enter your name here