Diresaun Nasionál Aprovizionamentu hosi Ministériu Obra Públika sensibiliza rejime jurídiku sertifikasaun no inskrisaun ba emprezáriu sira iha Vila Nova, Baucau. Imajen Tatoli/Natalino Belo.

BAUCAU, 15 dezembru 2021 (TATOLI) – Ministériu Obra Públika (MOP) liuhosi Diresaun Nasionál Aprovizionamentu, kuarta ne’e hala’o sensibilizasaun dekretu-lei rejime jurídiku serifikasaun no inskrisaun ba emprezáriu sira iha munisípiu Baucau.

Diresaun Nasionál Aprovizionamentu (DNA) lideradu Quintiliano Belo, sensibiliza dekretu-lei númeru 17/2021, 22 setembru hosi alterasaun dahuluk dekretu-lei númeru 27/2010, 22 dezembru, kona-ba Rejime Jurídiku Sertifikasaun no Inskrisaun ba Empreza Konstrusaun Sivíl no Konsultoria Téknika Sivíl.

Diretór Nasionál Aprovizionamentu hosi MOP, Quintiliano Afonso Belo, esplika sensibilizasaun ne’e ho objetivu atu kompaña sira halo inskrisaun iha MOP hodi hetan sertifikasaun bazea ba rekursu hanesan ekipamentu, finanseira, téknika no esperiénsia.

“Kuandu hetan tiha sertifikasaun, kompañia sira avontade kompete ho kompañia internasionál,” Diretór Nasionál Aprovizionamentu-MOP, ko’alia iha salaun apuramentu administrasaun munisípiu Baucau, Vila Nova, kuarta ne’e.

Nia fundamenta, dekretu-Lei númeru 27/2010 deside emprezáriu nasionál timór-oan bele tuir de’it projetu hosi millaun $1 to’o $7 maibé hafoin altera loke oportunidade ba emprezáriu atu kompete ho kompaña internasionál katak laiha limitasaun.

Nune’e altera ba dekretu-lei númeru 17/2021 laiha ona limisaun maibé atribusaun sertifikadu ho kategoria haat hanesan sertifikadu A ho rekursu finanseira iha Banku mínimu millaun $150, sertifikadu B finanseira tenke mínimu $75.000, B1-B2 totál $50.000 no C totál $25.000.

Hafoin inskrisaun foun, ekipa MOP sei halo verifikasaun iha terrenu kona-ba edifísiu, tékniku, ekipamentu inklui esperiénsia obra liuhosi kontratu ne’ebé antes ne’e hala’o hosi kompañia sira.

Diretór Nasionál Aprovizionamentu MOP, Quintiliano Afonso Belo. Imajen/ Tatoli Florencio Miranda Ximenes.

“Ami hein katak emprezáriu sira ativu tanba sertifikasaun ne’e hanesan rekoñesimentu hosi MOP ba empreza konstrusaun sivil, tanba laiha sertifikasaun sei laiha konfiansa,” Quintiano fó hanoin ba emprezáriu sira iha Baucau.

Sensibilizasaun rejime ne’e hala’o ona iha munisípiu Viqueque, ohin iha Baucau no sei kontinua ba Lautém, Liquiça, Ermera no munisípiu seluk.

Ministériu Obra Públika rejista ona kompañia hamutuk 2.000-resin komposta hosi kompañia ne’ebé hola parte iha áera eletrisidade, bee no saneamentu no konstrusaun sivíl.

Prezidente Kámara Komérsiu Indústria Timor-Leste (CCITL, sigla Portugés) Munisípiu Baucau, Estanislao Maria Quintas da Costa, hateten, ho alterasaun lei refere loke oportunidade atu kompete ho valór finanseira ne’ebé laiha limitasaun.

“Emprezáriu mak tenke prepara kondisaun rekursu ne’ebé sufisiente hanesan tékniku, ekipamentu ne’ebé utiliza ba implementasaun obra no orsamentu ne’ebé sufisiente,” Estanislao akresenta.

CCI-TL Baucau rasik rejista ona kompañia konstrusaun sivíl hamutuk 100-resin ne’ebé antes ne’e 200-resin maibe kada tinan redús tanba kondisaun rekursu.

Jornalista         : Natalino Belo

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here