Ministru Edukasaun Juventude no Desportu (MEJD), Armindo Maia, halo abertura ezame nasionál iha Eskola Ensinu Báziku Sentrál (EBC, sigla portugés), Farol, segunda (13/12). Imajen/MEJD

DILI, 15 dezembru 2021 (TATOLI)—Ministériu, Edukasaun, Juventude no Desportu (MEJD) sei prepara oportunidade halo xamada daruak ba estudante finalista ne’ebé la konsege partisipa iha ezame nasionál iha loron 13 to’o 17 dezembru.

Diretór Jerál Administrasaun no Finansaa MEJD, Antoninho Pires, konsidera ezame nasionál seidauk ramata tanba estudante lubuk ida seidauk partisipa.

“Segunda oin ita sei bolu fali estudante sira ne’ebé seidauk partisipa ezame nasionál atu mai tuir fali, ne’ebé sei iha dalan ba sira,” Diretór Jerál hateten iha resintu Parlamentu Nasionál, kuarta ne’e.

Notísia relevante: Finalista 81 hosi eskola haat iha Dili la partisipa ezame nasionál

Nune’e, parte ministériu preokupa tanba estudante lubuk ida la konsege partisipa ezame nasionál iha xamada dahuluk.

“Ita sei halo xamada daruak ba estudante finalista iha territóriu tomak hodi bele partisipa fali iha ezame nasionál, tanba prosedimentu ezame nian, kada tinan sempre iha oportunidade daruak. Agora xamada dahuluk nian maka estudante sira ultrapasa ona iha segunda foin lalais ne’e no xamada daruak ba sira ne’ebé iha kazu hanesan moras ou hetan asidente ruma ita bele tolera,” nia akresenta.

Tuir Diretór Jerál, ministériu laiha desizaun atu taka dalan ba estudante sira atu hakotu sira-nia estudu iha eskola, maske sira enfrenta kazu hanesan gravida no problema seluk, maibé direitu ne’e nafatin iha.

“Karik estudante hasoru problema ne’e mak lakohi eskola ona, ministériu sei labele halo buat ida,” nia dehan.

Parte ministériu iha ona dadus ba estudante finalista me’ebé la partispa ezame nasionál, maibé daudaun ne’e iha faze halo verifikasaun.

Totál estudante finalista territóriu nasionál ne’ebé partisipa ezame nasionál ne’e hamutuk 58.224, kompostu hosi estudante Ensinu Báziku 31.143, Ensinu Sekundáriu 22.223, Ensinu Sekundáriu Tékniku Vokasionál 4.858, enkuantu hosi Dili de’it iha totál estudante 16.752.

Jornalista : Tomé Amado

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here