Sekretáriu Autoridade Munisípal Baucau, Simão dos Santos Marques Pinheiro. Imajen Agência TATOLI/Natalino Belo.

BAUCAU, 15 dezembru 2021 (TATOLI) – Implementasaun projetu hitu (7) hosi Programa Dezenvolvementu Integradu Munisipál (PDIM) tinan fiskál 2020 nian iha munisípiu Baucau atinje 65%.

Sekretáriu Autoridade Munisipál Baucau, Simão dos Santos Marques Pinheiro, esplika, PDIM tinan 2020 hamutuk hitu komposta hosi konstrusaun moru merkadu Tuanau, reabilitasaun sede suku-neen hosi suku Samalari, postu administrativu Baucau Vila.

Nune’e mós sede suku Samalari, postu administrativu Baguia, sede suku Lelalai, sede suku Atelari, sede suku Uailaha no sede suku Uaigae.

“Progresu serbisu atinje ona 65%, ne’e inklui progresu konstrusaun moru ba programa merkadu seguru ne’ebé mak ami aprezenta projetu refere nia andamentu fíziku no kompañia kontinua ezerse nia funsaun nu’udar parseiru dezenvolvimentu,” Simão hateten iha Vila Nova, kuarta ne’e.

Nia fó-sai katak, pagamentu etapa dahuluk sei paga iha fulan-dezembru tinan ida-ne’e tuir pursentajen obra.

Projetu hirak-ne’e kompañia hahú obra iha inisiu fulan-setembru no tuir planu sei finaliza iha tinan oin ho totál orsamentu hamutuk $746.825.53 no 25% sei aloka iha orsamentu tinan 2022 kategoria reapropriasaun hamutuk rihun $392.2

“Mesmu iha situasaun pandemia mak hahú maibé realidade konstrusaun projetu hitu ne’e hatudu progressu,” Simão akresenta.

Bainhira konstrusaun moru merkadu finaliza tuir planu vendedór sira hosi fatin tolu hanesan vila antiga, nova no rotunda hamutuk 985 sei muda ba merkadu foun Tuanau tanba fasilidade bee-mos, saneamentu no eletrisidade finaliza ona.

Notisia relevante: Administrasaun Baucau selebra kontratu projetu PDIM ho empreza hitu

Jornalista         : Natalino Belo

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here