Diretór SJRO, Dionizio Taek. Imajen Tatoli/Abílio Elo Nini.

OÉ-CUSSE, 15 dezembru 2021 (TATOLI) – Grupu Juventude hamutuk 22 iha Rejiaun Administrativa Espesiál Oé-Cusse Ambeno (RAEOA), aprovadu iha avaliasaun proposta ba programa estímula empreendedorizmu sosiál hodi motiva joven sira hasa’e kreatividade iha baze.

Diretór Sentru Juventude Rejiaun Oé-Cusse (SJRO), Dionísio Taek, informa, proposta ne’ebé juventude sira submete iha hamutuk grupu 48 hodi partisipa iha atividade empreendedorizmu sosiál, ne’ebé mai hosi sub-rejiaun haat no suku 18.

Grupu 48 ne’e, komposta hosi grupu juventude sub-rejiaun Pante Makasar submete proposta 24, juventude sub-rejiaun Oésilo submete proposta 10, juventude sub-rejiaun Nítibe submete proposta (10) no juventude sub-rejiaun Pássabe submete proposta (4).

Maibé tuir tarjetu SJRO ba programa empreendedorizmu sosiál nian ba tinan 2021 to’o 2022 presiza grupu kreatividade hamutuk 30 kabe ba sub-rejiaun Pante Makasar, sub-rejiaun Oésilo, sub-rejiaun Niíibe no sub-rejiaun Pássabe, tanba tuir geografikamente sub-rejiaun Pante Makassar ho Nítibe akumula suku barak, nune’e presiza aumenta atividade kreatividade juventude.

“Maibé depois liuhosi prosesu avaliasaun ba proposta hirak-ne’e, durante loron tolu hahú hosi loron 09 to’o 11 novembru, depois tetu, analiza kle’an, ho nune’e ekipa avaliasaun konsege avalia no rezultadu grupu 22 mak passa, la pasa hamutuk 26,” Deonísio Taek, informa ba Agência Tatoli, iha SJRO Santa Rosa, Oé-Cusse, kuarta ne’e.

Nia fó sai katak, grupu 22 ne’e mai hosi sub-rejiaun haat, maka hanesan; iha sub-rejiaun Pante Makasar, iha grupu hitu ho totál fundu hamutuk $3,775,00 komposta hosi grupu Meubusi Mnasi ho atividade haki’ak ikan iha aldeia Sanane, suku Costa ho totál fundus $750,00.

Nune’e mós grupu Manemben Tasnat Pus, atividade hakiak bibi (pekuária) iha aldeia Nemun, suku Taiboko, ho totál fundu $412,50.

Grupu Foinsa’e Betbana’e, atividade haki’ak ikan iha aldeia Sanane, suku Costa ho totál fundu $350,00, grupu juventude Nekaf Mese, atividade kuda ai-manas (ortikultura) iha aldeia Oetfo, suku Costa, totál fundu $350,00.

Grupu Eno Bibolu, atividade haki’ak bibi iha aldeia Hauboni, suku Taiboko, ho totál fundu $412,50, grupu Noin Nilulat Sonamnasi, atividade kuda modo iha aldeia Noafafo, suku Cunha, ho totál fundus $750,00, grupu Moris Fali, atividade kuda modo iha aldeia Manuimpena, suku Lalisuk, ho totál fundu $750,00.

Putantu, iha sub-rejiaun Oésilo iha grupu hitu ho totál fundu hamutuk $4,545,00, komposta hosi grupu Jonilda, atividade haki’ak manu iha aldeia Nianapu, suku Bobometo, ho totál fundu $750,00, grupu juventude inovativu Saben, atividade halo bazu (pot) iha aldeia Saben, suku Bobometo, ho totál fundu $350,00.

Grupu Juventude Baun, atividade haki’ak Bibi iha aldeia Quibiselo, suku Bobometo, ho totál fundus $750,00, grupu juvnetude Fronteira Oésilo, atividade haki’ak bibi iha aldeia Saben, suku Bobometo ho totál fundus $445,00.

Grupu juventude Koko Unidade, atividade haki’ak manu iha aldeia Sifin, suku Usitasa’e, ho totál fundu $750,00.

Grupu Naroman Foinsa’e Hoineno, atividade haki’ak manu iha aldeia Hoineno, suku Bobometo, ho totál fundu $750,00, grupu Klibur Intelektual no Estudante Família Taqueno, atividade harii plaka iha aldeia Nibin, suku Usitaqueno, ho totál fundu $750,00.

Iha sub-rejiaun Pássabe, iha grupu tolu mak pasa ho totál fundu hamutuk $1,850,00, komposta hosi grupu juventude Fini ba Moris, atividade haki’ak bibi iha aldeia Pássabe, suku Abani, ho totál fundu $750,00.

Grupu juventude ba Jestaun Merkadu Pássabe, atividade haki’ak manu iha aldeia Pássabe, suku Abani, ho totál fundu $750,00, grupu juventude Se’i Taneis, atividade haki’ak fahi iha aldeia Malelat, suku Malelat, ho totál fundu $350,00.

Iha sub-rejiaun Nítibe, iha grupu lima maka pasa ho totál fundu hamutuk $2,581,00, komposta hosi grupu Moris Foun, atividade haki’ak bibi iha aldeia Oamna, suku Usitaco, ho totál fundu $350,00.

Grupu Moinfani Bimeni, atividade haki’ak bibi iha aldeia Nítibe, suku Usitaco, ho totál fundu $500,00, grupu Laloran Rai Ikun, atividade hamaran ikan (peska) iha aldeia Citrana, suku Bene-Ufe, ho totál fundu $750,00.

Grupu Poalali Rai Ikun, atividade haki’ak fahi iha aldeia Manan, suku Bene-Ufe, ho totál fundu $631,00, grupu juventude Hadomi Futuru, atividade haki’ak bibi iha aldeia Cabana, suku Suni-Ufe, ho totál fundu $350,00.

“Totál orsamentu ne’ebé finansia ba grupu 22 ne’e hamutuk $12,751,00, ne’ebé hetan apoiu másima mai hosi Sekretaria Estadu Juventude no Desportu (SEJD),” Dionísio Taek fó-sai.

Entretantu, ekipa avaliasaun ba proposta 48 ne’e mai hosi parseriu Governu no Oragnizasaun Naun Governamentál (ONG) hanesan, hosi Sekretaria Rejionál Asuntu agrikultura, Sekretáriu Komérsiu no Indústria, Parlamentu Foinsa’e, Sosiedade Sivíl, Gabinete Prezidente Autoridade liuhosi servisu promosaun igualdade no inkluzaun.

Nune’e tuir ajenda Sentru Juventude Rejiaun Oé-Cusse, sei distribui fundu hirak-ne’e fulan dezembru ne’e nia laran, hodi fasilita grupu juventude sira ezekuta ona planu no atividade kada grupu idak-idak nian.

Jornalista            : Abílio Elo Nini
Editór                  : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here