Espoza Prezidente Repúblika, Cidalia Lopes Mouzinho Nobre Guterres, entrega simbolikamente nesesidade bázika, ba kongregasaun Servarum do Espirito Santo (SSPS) iha Maliana. Imajen Tatoli/Sérgio da Cruz.

BOBONARO, 14 dezembru 2021 (TATOLI) – Espoza Prezidente Repúblika Prancisco Guterres ‘Lú Olo’, Cidália Nobre Lopez Mouzinho Guterres, tersa ne’e apoia nesesidade bázika ba kongregasaun komunidade Servarum do Espírito Santo (SSPS), iha suku Holsa, postu administrativu Maliana, munisípiu Bobonaro.

Nesesidade bázika ne’e mak hanesan, fós saka-neen, rinso kaixa 10, ikan deho kaixa rua, ember 30, lipa lusin tolu, toalla ho ropa plástiku rua, gayun pakote rua, mina kaixa ida, masin-midar karon ida, sabadun kaixa haat.

“Atividade ne’e hanesan bainbain, bainhira Prezidente Repúblika halo vizita ba munisípiu sira, ami sempre ba vizita uma-mahon ne’ebé mak halibur ita-nia oan sira, tantu madre sira mak halibur nomós balu hosi estadu nia hanesan MSSI ne’ebé sempre fó apoia, entaun ami mós ba vizita fo netik apoiu ruma,” nia hateten iha intervensaun.

“Ita hela iha asrama situasaun apertada oituan, maibé ida-ne’e normál, tanba bele aprende buat barak, kuandu fila ba uma ita bele halo buat hotu tanba simu ona esperiénsia oinoin, formasaun hosi madre sira,” nia subliña.

Entretantu, Superiora Komunidad SSPS Maliana, Madre Lúcia Bata, agradese espoza Prezidente Repúblika nian tanba apoia karidade ne’e.

“Vizita ida-ne’e ami sente hanesan na’in-feto ne’ebé mai vizita nia feto maluk santa Isabel, ida iha tempu adventu, hein Jesus atu moris, entaun mai vizita atu fahe esperiénsia domin ne’ebé hetan hosi Maromak,” Madre ne’e agradese.

Entretantu Dormitóriu Kongregasaun Komunidade Servarum do Espírito Santo ne’e harii iha tinan 2014, ho objetivu atu halibur labarik feto sira-ne’ebé kbiit laek, la kontinua estudu kauza hosi fatór ekonomia, morál no estudante sira-ne’ebé mai eskola hosi fatin dook.

Purtantu durante tinan neen nia laran, labarik feto sira iha SSPS hamutuk 200 remata ona estudu iha fatin ne’e no dadaun ne’e deside fila-fali ba moris ho família.

“Durante ne’e sira aprende kursu, soru-tais, suku-ropa, halo doxe, depois hosi sira-ne’ebé kursu nian ne’e na’in-tolu ami haree idade sei kiik ami hatama eskola fali to’o remata,” nia haktuir.

Kada tinan Kongregasaun Komunidade SSPS simu labarik feto sira atu hela iha dormitóriu ne’e hamutuk na’in-24, maibe tinan ne’e tanba kestaun pandemia Covid-19 simu deit na’in-hitu de’it, ho nune’e totál dadus labarik feto na’in-21 mak hela iha dormitóriu ne’e.

“Realidade ami hasoru udan hanesan ami sente kontente tanba bee barak ona, sé lae ami ba kuru de’it iha mota, hodi uza ba nesesidade loron-loron, maibé durante ne’e ami la’o hamutuk buat hotu la’o di’ak,” nia informa.

Jornalista         : Sérgio da Cruz

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here