Ekipa konjunta halo inspesaun iha instalasaun empreza Perissos, Hudi-laran, kuarta (15/12). Imajen TATOLI/Argentina Cardoso

DILI, 15 dezembru 2021 (TATOLI)—Ekipa konjunta ne’ebé kompostu hosi Autoridade Inspesaun no Fiskalizasaun ba Atividade Ekonómika no Sanitária (AIFAESA), Polísia Nasionál Servisu Investigasaun Kriminál (PNSIK) ho Servisu Informasaun Polísia (SIP) halo inspesaun, kuarta ne’e,  ba empreza importadora lima.

Inspetór Jerál AIFAESA, Ernesto Monteiro, hateten, inisiativa ne’e hodi hatan ba preokupasaun komunidade ba folin sasán iha merkadu ne’ebé hahú sa’e.

“Entaun, ohin ekipa konjunta halo inspesaun ba estabelesimentu importadór lima, kompostu hosi nesesidade bázika tolu no materiál konstrusaun rua, hodi rekolla dadus presu sosa hosi importadór no haree presu ne’ebé distribui, tanba ita-nia lei presu justu ne’e katak labele halo limita ba sira atu hetan lukru,” Inspetór Jerál AIFAESA, hateten hafoin halo inspesaun, iha Colmera.

Notísia relevante: AIFAESA seidauk simu keixa hosi komunidade relasiona folin sasán sa’e

Tuir Ernesto Monteiro, ekipa konjunta halo inspesaun ba loja distribuidór sira de’it no la ba loja  kiik sira, tanba loja kiik sira sosa tutan hosi loja distributór sira.

Hosi inspesaun ne’e, kada loja distributór sei hatama lista folin sasán sosa hosi rai-li’ur no fa’an iha Dili, ne’ebé ikus mai parte AIFAESA mak sei halo analiza presu sasán sira ne’e sa’e to’o hira.

Tuir Dekretu-Lei presu justu 29/2011, define katak operadór ekonómiku sira bele hetan lukru hosi sasán ne’ebé sira fa’an maibé labele liu 10 to’o 15%.

“Bainhira liu ida ne’e, ita konsidera tama kategoria krime no sei prosesa ba ministériu públiku,” nia dehan.

Iha biban hanesan, Xefe Ezekutivu empreza Perissos Lda, Meliany Sanjaya, admite katak daudaun ne’e empreza hasa’e oituan  folin nesesidade bázika tanba impaktu hosi COVID-19 ne’ebé afeta ba mundu tomak no halo limita transporte tama ba rai-laran.

“Ita hasa’e maibé la barak ida, hasa’e $0,25 to’o $0,50 tanba sasán hosi supplier mós sa’e, entaun bainhira sasán to’o ita hasa’e oituan tanba transportasaun sasán ho ró menus,” nia dehan.

Nune’e mós, Xefe Administrasaun empreza Fortuna Lorosa’e Lda, ne’ebé importa mina sona globus no terigu, hateten, sira-nia parte agora hasa’e folin mina tanba folin sasán sa’e hahú hosi fábriku iha Indonézia.

“Folin mina globus litru lima antes ne’e fa’an ida $6, maibé agora ami hasa’e ba masa ida $7,50, ne’ebé kona-ba mina ne’e ita hasa’e folin $1 to’o $2 de’it,” nia informa.

Xefe Ezekutivu empreza HPP, Lda, Xue Banyaan, hateten, empreza durante ne’e hatama materiál konstrusaun hanesan, semente, besi no seluk tan, ne’ebé daudaun ne’e sira aumenta folin uitoan maibé la barak liu, tanba impaktu transportasaun marítima menus.

Empreza lima ne’ebé ekipa konjunta ohin halo inspesaun mak hanesan, ba nesesidade bázika Perissos, Lisun, Fortuna Lorosa’e Lda no ba materiál konstrusaun mak HPP, no Mandiri Jaya.

Jornalista : Arminda Fonseca

Editora      : Julia Chatarina

PUBLISIDADEiklan

1 KOMENTÁRIU

  1. Sasán folin loloos ne’e sa’e maka’as tebe-tebes, até besik 50%, iha kazu mina te’in nian. Ida-ne’e ekipa hatene ka lae? Tuir ha’u-nia hanoin sira bele la hatene karik tanba durante ne’e sira toba de’it, sira foin hakfodak bainhira ema bisu-bisu maka’as iha média sira, tantu konvensionál no mós sosiál.

HAKEREK NO HATÁN

Please enter your comment!
Please enter your name here