Folin nesesidade bázika hahu sa'e iha loja no kioske sira iha RAEOA. Imajen Tatoli/Abílio Elo Nini.

OÉ-CUSSE, 14 dezembru 2021 (TATOLI) – Presu sasán iha Rejiaun Administrativa Espesiál Oé-Cusse Ambeno (RAEOA) hahú sa’e, tanba ne’e husu Autoridade Inspesaun no Fiskalizasaun Atividade Ekonómia Sanitária (AIFAESA) atu halo intervensaun iha nasionál.

Diretora ba Loja JLMS Tanu, Albina Nule, informa folin nesesidade bázika sa’e iha inísiu dezembru to’o ohin loron, ne’e la’os loja-na’in sira mak manipula maibé sa’e kedas hosi Dili, nune’e afeta to’o rejiaun ne’e.

“Sasán folin sa’e la’ós ami (loja-na’in) mak manipula, maibé sa’e kedas hosi nasionál, tanba sasán sira-ne’e mai to’o Timor loke hosi kontentór sira mak folin sa’e, entaun ami hanesan ba kompra sasán sira-ne’e, presiza aumenta uituan nune’e ita bele hetan netik nia funan, maibé ita husu nafatin ba AIFAESA atu tau konsiderasaun ba folin ne’e,” nia informa ba Agência Tatoli iha merkadu Numbei, Oé-Cusse, tersa ne’e.

Nia fó sai katak, sasán ne’ebé folin sa’e maka, mina sona marka bimoli litru lima kaixa ida folin antes ne’e $16.00, maibé daudaun ne’e sa’e ba $28,50, entaun fa’an fali masa ida ho folin $7,75 to’o $8.00, ba litru ida antes ne’e $1,00 agora fa’an fali ba $1,25.

La’os Bimoli de’it maibé sasán seluk hanesan super mie antes ne’e $6,50/kaixa maibé agora sa’e to’o $8,00, nune’e moos fós kilograma 20 antes ne’e $9,75, agora sa’e ba $10,50, kilograma 25 antes ne’e folin $11,50 agora sa’e ba $13,00.

“Tanba sasán tula iha ró selu, mai to’o portuáriu selu ema hatún sasán ne’e, entaun ami fa’an fali dalaruma ami aumenta $1,00 to’o $2,00, nune’e ami bele hetan nia funan, tanba transporte ba mai Dili-Oé-Cusse ne’e gasta ona $400,00, ba $150,00 mai fali lori sasán $250,00,” nia fundamenta.

Entretantu, Diretór Loja Bacara Xia Xian Chou, Jacinto, informa sasán nesesidade bázika sa’e tanba distribudór sira iha Díli hahú hasa’e folin, entaun afeta to’o enklave ne’e.

“Bimoli agora ami mós la hola ona, tanba agora folin sa’e to’o $29,00, osan iha maibé kuandu sasán folin sa’e maka’as ema hola mós laiha, tanba agora besik Natál buat hotu-hotu folin sa’e, komesa hosi ai-fuan, uvas, derok inklui manu-tolun no seluk-tán,” nia katak.

Nia fó-sai katak, ema balun halo protesta, maibé nia fó esplikasaun tuir saida mak hetan iha nasionál kona-ba folin sasán sa’e derrepente ne’e.

“Ami loja na’in triste maibé ita fiar nafatin ba Governu atu halo intervensaun,” Diretór Loja Bacara Xia Xian Chou ne’e informa.

Jornalista         : Abílio Elo Nini

Editór               : Evaristo Soares Martins

PUBLISIDADEiklan

1 KOMENTÁRIU

HAKEREK NO HATÁN

Please enter your comment!
Please enter your name here