Prezidente Republika, Francisco Guteres ‘Lu Olo, ho nia espoza sunu-lilin iha Cruz boot, osuáriu munisípiu Bobonaro. Imajen Tatoli/Sérgio da Cruz.

BOBONARO, 14 dezembru 2021 (TATOLI) – Prezidente Repúblika (PR), Francisco Guterres ‘Lú Olo’, akompaña hosi nia espoza Cidalia Nobre Mouzinho, tersa ne’e presta omenajen ba mártir libertasaun nasionál hamutuk 578 iha osuáriu, suku Odomau, postu administrativu Maliana, munisípiu Bobonaro.

Xefe estadu presta omenajen ne’e liuhosi sunu-lilin nu’udar sentimentu domin no agrdesimentu ba mártir sira-ne’ebé sakrifika sira-nia vida tomak ba luta libertasaun nasionál.

“Ohin, loron ita moris iha liberdade no independénsia folin boot tebes no karun tebes, tanba ne’e ohin ami mai presta omenajen ida-ne’e atu valoriza sira-nia sakrífisiu ba luta libertasaun nasionál,” Xefe estadu informa jornalista sira hafoin presta omenajen.

Restu mortál sira iha osoáriu Maliana hamutuk 578. Hosi númeru ne’e na’in-299 mai hosi postu administrativu Maliana Vila, Lolotoe no Bobonaro, enkuantu 279 mai hosi postu administrativu Cailaco, Balibo no Atabae ne’ebé lakon vida hosi hahú 1975 to’o 1999.

Xefe kuda ai-kameli

Prezidente Repúblika, Francisco Guterres ‘Lu Olo’, kuda ai-kameli iha resintu osuáriu mártir libertasaun iha suku Odomau, postu administrativu Maliana Vila, munisípiu Bobonaro. Imajen Tatoli/Sérgio da Cruz.

Iha parte seluk, Prezidente Repúblika no nia espoza, akompaña hosi Xefe Casa Civil no Casa Militar, Vise-Ministru Administrasaun Estatal, Lino de Jesus Torrezão, autoridade munisípiu Bobonaro kontinua kedas kuda ai-kameli espésie 20 iha resintu osuáriu Maliana sai nu’udar kampaña nasionál kuda ai-oan ne’ebé xefe estadu rasik inísia “Sidadaun ida ai-oan ida.”

Xefe estadu informa, kuda ai-oan ne’e simbolikamente de’it hodi hatudu vontade ba povu munisípiu Bobonaro atu idak-idak bele iha konxiénsia ema ida kuda ai-oan ida iha fatin hotu.

“Kuda ai-oan ne’e ba moris di’ak ita-nia, moris di’ak ba ita-nia oan ho bei-oan sira, atubele hetan ambiente ida-ne’ebé saudável ba moris aban bainrua nian, tanba ne’e ha’u husu ba ita-nia sidadaun hotu atu kuida nafatin ai-oan sira-ne’e no fó hatene tutan nune’e ema hotu bele kuda iha fatin ne’ebé de’it,” Xefe estadu apela.

Iha fatin hanesan, Xefe Departamentu Reprezentasaun Territoriál Florestál no Planta Industriál Munisípiu Bobonaro, Martinho Bilimau, sente kontente ho prezensa xefe estadu nian.

“Ha’u agradese tebes ho moto prezidente nian katak ‘ema ida ai-hun ida’, tanba ida-ne’e bele motiva ita-nia sidadaun sira hotu iha munisípiu Bobonaro, atu salva ita-nia ambiente hosi risku dezastre naturál, no ita bele moris iha ambiente ne’ebé moos no seguru,” nia katak.

Tuir planu, aban parte florestál Bobonaro lansa distribuisaun ai-oan ba postu administrativu Maliana Vila, Lolotoe, Atabae, Balibo, Bobonaro no Cailaco hamutuk 1.200 ho espésie ai produsaun hanesan mahoni, ai-teka. Nune’e mós ai konservasaun hanesan samatuku, kakeu no au nune’e kada postu neen ne’e sei hetan ai-oan 200.

Jornalista         : Sérgio da Cruz

Editór               :Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here