Prezidente Repúblika, Francisco Guterres ‘Lú Olo’, presta omenajen ba jornalista na'in-lima ne’ebé mate iha Balibo iha tinan 1975. Imajen mídia PR.

BOBONARO, 14 dezembru 2021 (TATOLI) – Prezidente Repúblika (PR), Francisco Guterres ‘Lú Olo, husu komunidade Balibo kontinua prezerva no kuida istória Balibo Five tanba hola-parte iha prosesu luta ba libertasaun nasionál.

Xefe estadu hato’o asuntu ne’e bainhira vizita Balibo Five hodi presta omenajen ba jornalista estranjeiru na’in-lima ne’ebé mate iha 16 outubru 1975. Haree ba dukumentu istóriku sira hanesan fotografia ne’ebé jornalista hirak-ne’e halo serbisu to’o hakotu ís hosi militár Indonézia.

Jornalista na’in-lima ne’e mak hanesan; Greg Shackleton (Reporter) ho idade (29), Tony Stewart (Gravadór lian) idade (21), Gary Cunninghan (Operadór Camera) idade (27) hosi mídia HSV-7 (seven Netwrok) Melbourne, Brian Peters (Operadór Camera) idade (26) no Malcolm Rennie (Reporter) idade (29) hosi mídia TNC-9 (Nine Network) Sidney.

“Ha’u husu ba populasaun sira atu prezerva nafatin, kuidadu nafatin fatin ida-ne’e tanba nu’udar istória ita-nian, istória povu Timor-Leste nian, partikularmente ba povu Balibo,” Xefe estadu hato’o mensajen ne’e iha Balibo, tersa ne’e.

Xefe Estadu rekoñese jornalista estranjeiru na’in-lima ne’e nia kontribuisaun iha situasaun difísil iha 1975 tanba divulga situasaun polítiku Timor nian ba komunidade internasionál.

“Funu hahú hosi invazaun Indonézia ne’ebé hahú hosi fronteira, hodi oho jornalista na’in-lima, ne’ebé mai atu halo kobertura ba ita-nia situasaun iha altura 1975 katak Indonézia hakat ita-nia rai-ketan hodi tama ita-nia rai,” Xefe estadu relembra.

Administradór Postu Administrativu Balibo, Rosário Gonçalves haktuir, uma-ne’e (agora Balibo Five) sidadaun Xinés nian molok 1975.

Bainhira funu mosu 1975 entaun militár Indonézia tama mai territóriu Timor-Leste nian, no jornalista na’in-lima ne’e ba halo kobertura iha Benteng (Kastilu), fila mai subar iha kuartu-laran, militár Indonézia sira kaer, baku no oho kedas iha fatin ne’e.

Nia fó-sai katak, uma ne’e hetan fali konstrusaun iha 2003-2004 tanba kooperasaun ho Governu Austrália liuhosi jornalista na’in lima ne’e nia kolega, família vítima tau hamutuk osan hodi sosa uma ne’e ho montante $55.000.

“Agora uma ne’e jere hosi ekipa ne’ebé mak reprezenta hosi família vítima sira no komunidade Balibo ho naran ‘The Balibo House Trust’ nian mak jere uma ne’e sai hanesan parseiru Balibo no mós Australia,” nia esplika.

Kolaboradór iha Muzeu Balibo Five, Mário Octoviano Soares, informa, The Balibo House Trust mós loke ona klínika nehan, ótel Balibo Fort no realiza atividade sira hanesan guia turístika, kursu inglés no kursu ospitalidade.

The Balibo Trust aluga ona pouzada Balibo transforma sai Balibo Fort Hotel no edifisiu istóriku sira seluk iha fatin ne’e, durante tinan 30 projetu ne’e serbisu hamutuk ho governu Vitoria hodi prezerva istória no orijinalidade arkeolojia,” nia katak.

Jornalista         : Sérgio da Cruz

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here