Situasaun debate no votasaun OJE 2022 iha faze espesialidade, iha sala plenária Parlamentu Naasionál, segunda (13/12). Imajen TATOLI/António Gonçalves

DILI, 14 dezembru 2021 (TATOLI)–Parlamentu Nasionál (PN) liuhosi diskusaun no votasaun Orsamentu Jerál Estadu (OJE) 2022 iha faze espesialidade, aprova orsamentu ba Ajénsia Promosaun Investimentu no Exportasaun (TradeInvest) ho montante $791.514 ho rezultadu votu a-favór 45, kontra 0, no abstensaun 12.

Orsamentu aprovadu fahe ba kategoria bens servisu $791.514, enkuantu kategoria saláriu vensimentu, kapitál menór, kapitál dezenvolvimentu no transferénsia públika laiha.

Aleinde ne’e, verba ne’ebé prevee sei finasia ba programa rua hanesan boa-governasaun no jestaun instituisionál $314.694 inklui investimentu no diversifikasaun ekonómika $476.820.

Notísia relevante: Asosiasaun mundiál WAIPA prontu apoiu TradeInvest Timor-Leste

Iha tinan 2021, orsamentu ba TradeInvest ho montante $1.036.354, kompostu hosi bens no servisu $1.006.339, kapitál menór $30.015.

TradeInvet hanesan ajénsia promosaun investimentu no exportasaun atu promove divulga, koordena, fasilita no akompaña investimentu no re-investimentu privadu nomós exportasaun rai-laran.

Ajénsia ne’e hanesan responsável ba emisaun sertifikadu exportadór sertifikadu investidór no akordu espesiál investimentu tuir lei artigu 5 dekretu lei númeru 45/2015, 30 dezembru.

TradeInvest mai ho vizaun atu aumentu valór investimentu privadu iha territóriu, aumentu númeru esportasaun no mellora parseria iha área investimentu no esportasaun.

Iha tinan 2019 ajénsia ne’e emite sertifikadu investimentu ba Timor Port  ne’ebé halo investimentu iha área Tibar ho kapitál investimentu hamutuk millaun $300-resin, kompostu hosi parseiru setór publiku (Governu) no mós envolve setór privadu seluk, Empreza Ami hosi Austrália ho kapitál millaun $6,5, ne’ebé halo investimentu ba prosesamentu industria bee, no ikus liu maka Sentrál Moris ho kapitál millaun $4,2 ne’ebé halo investimentu iha setór pekuária ninian.

Jornalista : Armida Fonseca

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here