Situasaun debate faze espesialidade, iha sala plenária Parlamentu Naasionál, segunda (13/12). Imajen TATOLI/António Gonçalves

DILI, 14 dezembru 2021 (TATOLI)—Reprezentante povu iha uma fukun Parlamentu Nasionál liuhosi dskusaun espesialidade ba proposta lei Orsamentu Jerál Estadu (OJE) 2022 aprova orsamentu $647,806 ba Agência Noticiosa de Timor-Leste, Institutu Públiku (TATOLI, I.P) ho votu a-favór-47 kontra 0 no abstensaun 16.

“Nune’e Orsamentu Jerál Estadu ba TATOLI pasa,” Prezidente Parlamentu Nasionál, Deputadu Aniceto Longuinhos Guterres Lopes, anunsia liuhosi plenária, tersa ne’e.

Agência Noticiosa de Timor-Leste, Institu Públiku (TATOLI, I.P) ho objetivu sai fonte informasaun ofisiál Estadu Timor-Leste ne’ebé iha kapasidade no kbiit elabora produtu informasaun no notísia ne’ebé nesesita hosi públiku utilizadór informasaun iha eskala nasionál, rejionál no internasionál.

Orsamentu ba tinan 2022 ne’e, sei aloka ba bens servisu $620,795, kapitál menór $27,011, saláriu vensimentu, kapitál dezenvolvimentu no transferénsia públika laiha, no hosi orsamentu ne’e sei finansia ba program rua (2), sub-programa tolu (3) no ativiade ualu (8).

Programa garante liberdade espresaun no asesu informasaun prevee $399,779 no programa boa-governasaun no jestaun instituisionál prevee $248,027.

Programa garante liberdade espresaun no asesu informasaun ho objetivu médiu prazu aumenta númeru populasaun ezerse no espresa sira-nia opiniaun ba Governu kona-ba asuntu governasaun, dezenvolvimentu no asuntu importante sira seluk.

Ho sub-programa garante asesu informasaun ho atividade reforsa funsionamentu instituisaun,  garante fasilidade no ekipamentu servisu adekuadu no modernu, reforsa servisu redasaun expande konteúdu no asegura kualidade.

Programa boa-governasaun no jestaun instituisionál ho sub-programa boa-governasaun no atividade Inspesaun, fiskalizasaun no auditoria, abordajen integradu jéneru.

Sub-programa jestaun instituisional ho atividade jestaun finanseira, administrasaun no lojístika, jestaun rekursu umanu, aprovizionamentu no jestaun kontratu.

Jornalista : Nelson de Sousa

Editór      : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here