Traballadór timor-oan hosi Austrália tuun hosi Aviaun Qantas iha Aeroportu Comoro, kuarta ( 24/02/2021). Imajen TATOLI/António Gonçalves

DILI, 14 dezembru 2021 (TATOLI)—Ministru Transporte no Komunikasaun (MTK), José Agustinho da Silva, hateten, parte ministériu sei halo koordenasaun ho entidade aérea relasiona ho reativa voo komersiál.

“Ha’u relata ona iha reuniaun Konsellu Ministru atu reativa voo komersiál, ne’ebé parte MTK no Autoridade Aviasaun Sivil Timor-Leste (AACTL, sigla portugés) hanoin laiha problema, importante halo ona ligasaun ho empreza aérea sira, agora filafali ba aviaun na’in,” Ministru José Agustinho, relata ba Agência TATOLI iha resintu Parlamentu Nasionál, tersa ne’e.

Iha loron 04 abríl 2020, MTK liuhosi AACTL suspende provizóriu voo internasionál tanba situasaun pandemia.

Notísia relevante: Hahú Ohin, AACTL Suspende Temporáriu Operasaun Komersiál Internasionál

Tuir Ministru, voo komersiál ne’e ba empreza aérea ne’ebé rejistu iha AACTL inklui nasaun sira ne’ebé Timor-Leste estabelese ona akordu servisu aéreu.

“Sira ne’e maka bele iha voo komersiál, maibé ba nasaun ne’ebé seidauk konsege iha akordu servisu aéreu, sei iha prosesu laran atu nafatin asegura ho karatér charter (aluger), hanesan ho Malázia. Kona-ba reativa voo komersiál hosi Governu nia parte laiha problema, kuandu empreza aérea hatama pedidu bele ona. Maibé to’o agora seidauk simu pedidu hosi empreza ida hanesan antes ne’e iha aviaun Citilink, Sri Wijaya, no Airnorth Austrália,” nia dehan.

Enkuantu, Austrália seidauk dezigna aviaun ne’ebé atu asegura voo regulár, maski  iha ona akordu servisu aéreu ho Timor-Leste.

“Foin lalais iha ona diskusaun ho Embaixadór Austrália atu realiza seremónia dezignasaun ba empreza aérea hosi hodi asegura konetividade entre nasaun rua ne’e,” nia akresenta. 

Notísia relevante: Akordu Servisu Aéreu Entre TL ho Austrália Hetan Ona Aprovasaun

Tuir Ministru, kestaun ne’e kabe ba kompeténsia Governu Austrália, maibé iha ona informasaun katak atu dezigna aviaun Qantas.

“Durante ne’e mai ona, maibé ho karatér charter tanba ita seidauk formaliza no Governu Austrália rasik seidauk dezigna aviaun ida, tanba ne’e ita hein de’it,” governante ne’e tenik.

 Jornalista : Antónia Gusmão

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here