Atividade atualiza dadus jeolójiku hosi IPG, I.P iha auditorium Fakuldade Enjeñaria UNTL, Hera, tersa (14/12). Imajen/MPM

DILI, 14 dezembru 2021 (TATOLI)–Institutu Petróleu no Jeolójia, Institutu Públiku (IPG, I.P, sigla portugés), tersa ne’e, atualiza estudu rekursu no risku jeolójiku ba dezenvolvimenu sustentabilidade iha Timor-Leste.

Ministru Petróleu no Minerál (MPM), Víctor da Conceição Soares, hateten, IPG, I.P estabelese liuhosi Dekretu-Lei númeru 33/2012, 18 julli 2012, ho objetivu prinsipál halo levantamentu dadus no estudu sientífiku hodi prodús informasaun jeolójika, armazenamentu dadus no jere informasaun kona-ba rekursu petróleu, gás no minerál inklui risku jeolójiku no mós idrojeolojia iha territóriu tomak.

“IPG hala’o knaar estudu no investigasaun, inklui sai hanesan sentru rejistu no repozitóriu nasionál ba informasaun relativamente rekursu jeolójiku. Objetivu jerál MPM ligadu ho IPG mak promove peskiza ho estudu, identifikasaun no mapamentu ba rekursu petróleu no minerál, risku jeolójiku, akiferu no kualidade bee-moos, inklui prepara no dezenvolve rekursu umanu espesializadu iha setór petróleu, minerál no enerjia renovável,” Ministru Víctor, hateten iha abertura seremónia atualiza dadus jeolójiku, iha auditorium Fakuldade Enjeñaria Universidade Nasional Timor-Lorosa’e (UNTL), Hera.

Notísia relevante: IPG-ANAS, I.P selebra akordu estudu rekursu bee iha rai okos

Governante ne’e apresia tanba IPG, I.P bele realiza atividade ne’e durante loron rua, hahú loron 14 no 15 dezembru, no iha esperansa katak atividade ne’e sei fó benefísiu ba parte interesada hotu.

“Ha’u hakarak enkoraja partisipante sira, liuliu komunidade akadémiku Fakuldade Enjeñaria, Siénsia no Teknolojia UNTL, tantu dosente no estudante, atu partisipa másimu no entusiazmu, nune’e bele koñese di’ak liután IPG no ninia papél. Tanba komunidade akadémiku tenki atualiza informasaun atu hasa’e koñesimentu hodi hadaet ba ema seluk, tanba bainhira hetan informasaun ho karater koñesimentu akadémiku, ne’e ema bolu matenek-na’in,” Ministru motiva partisipante.

Iha biban hanesan, Prezidente IPG, I.P, Gabriel Gaspar Aparício de Oliveira, hateten, eventu ne’e atu atualiza serbisu sira ne’ebé institutu halo desde estabelese estrutura foun iha tinan 2020-2021.

“Ami halo peskiza no buat hotu durante tinan-ida fulan-haat, tanba ne’e ohin ami update filafali,” nia akresenta.

Serbisu ne’ebé atualiza maka hanesan peskiza kona-ba petróleu, minerál, risku jeolójiku, poténsia jeotérmika, mapamentu jeolójiku, idrojeolojia (bee), no estratigrafia Timór nian.

“Estudu sira ne’e balun presiza tempu naruk atu hetan rezultadu no balun finaliza iha tempu badak hanesan estudu ba rekursu bee, ne’ebé halo estudu jeofíku no aprova poténsia liuhosi perfurasaun ne’e ita halo iha fulan-ida nia laran bele finaliza ona, enkuantu estudu ba petróleu no gás presiza tempu naruk tanba presiza kolleta dadus,” nia haktuir.

Nune’e Prezidente IPG, I.P konsidera, estudu ne’e importante hotu maibé ba nasaun rasik presiza haree kestaun petróleu no gás tanba iha poténsia barak, maibé hosi parte IPG maka rekolla dadus no  entidade relevante fó pareser.

Durante halo estudu, institutu hasoru difikuldade hanesan fasilidade, laboratóriu, edifísiu, no rekursu umanu.

Estudu ne’ebé IPG, I.P realiza hahú tinan 2012 to’o 2020 ho kustu millaun $12 no iha tinan 2021 iha alokasaun millaun $2.

Eventu ne’e partisipa hosi entidade relevante no estudante Fakuldade Enjeñaria, Siénsia no Teknolojia UNTL.

Jornalista : Antónia Gusmão

Editora      : Julia Chatarina    

PUBLISIDADEiklan

HAKEREK NO HATÁN

Please enter your comment!
Please enter your name here