Prezidente Konsellu Diretivu Agência TATOLI, I.P, Manuel Pinto, no Prezidente Konsellu Administrasaun IGE, I.P, Ermenegilda da Costa Laurentina, ko’a vita iha seremónia entrega cube house, iha resintu edifísiu Farol, tersa (14/12). Imajen TATOLI/António Gonçalves

DILI, 14 dezembru 2021 (TATOLI)–Institutu Jestaun Ekipamentu, Institutu Públiku (IGE, I.P), iha tersa ne’e, ofisialmente entrega cube house neen ba Agência Noticiosa de Timor-Leste, Institutu Públiku (TATOLI, I.P), ne’ebé instala ona iha resintu mídia estatál ne’e, iha Farol.

Prezidente Konsellu Diretivu Agência TATOLI, I.P, Manuel Pinto. Imajen TATOLI/António Gonçalves

Iha biban ne’e, Prezidente Konsellu Diretivu Agência TATOLI, I.P, Manuel Pinto, agradese ba parseiru tanba bele responde ona pedidu atu fasilita serbisu.

“Agradese ba IGE, I.P tanba fasilita ona cube house, sentimentu ne’e ami labele espresa ho liafuan, tanba ajuda ona ami iha tempu ne’ebé ami presiza,” Prezidente Konsellu Diretivu Agência TATOLI, I.P, hateten iha seremónia entrega.

Iha fatin hanesan, Prezidente Konsellu Administrasaun IGE, I.P, Ermenegilda da Costa Laurentina, apresia ho kooperasaun, nune’e hodi bele fasilita malu serbisu.

“Ami kontente simu liafuan agradesementu, maibé labele monu le’et de’it, tenke tane nafatin agradese ne’e ba futuru ne’ebé di’ak. Ha’u husu atu labele haree nia modelu, maibé oinsá ita bele serbisu ho dignu no kualidade di’ak hodi serví nasaun, tanba fatin la’ós sai sasukat maibé rekursu mak tenke prepara no serbisu ho boa vontade,” nia hameno.

Notísia relevante: TATOLI I.P ho IGE asina akordu apoiu Coby House

Aleinde ne’e, IGE, I.P nia serbisu mak halo normalizasaun mota, aterru no loke estrada foun, apoiu interministeriál, apoiu serbisu emerjénsia hanesan relijozu, universidade inklui ajénsia sira, nune’e bele apoiu Agência TATOLI, I.P hodi fasilita serbisu.

Ba futuru sei iha manutensaun ba instalasaun ne’ebé iha ona, nune’e bele uza ba tempu naruk.

Prezidente Konsellu Administrasaun IGE, I.P, Ermenegilda da Costa Laurentina. Imajen TATOLI/António Gonçalves

“Agradese ba ekipa téknika hosi parte rua ne’ebé serbisu hamutuk harii cube house, nune’e sei nafatin iha koordenasaun tanba uma ne’ebé harii iha manutensaun, hanesan mós ba cube house,” nia akresenta.

Antes ne’e, mídia estatál halo kontaktu ba ninia parseiru iha fulan-jullu nia laran, ne’ebé hato’o difikuldade kona-ba espasu atu akumula aumentu rekursu umanu iha parte redasaun no administrasaun.

Nune’e, iha loron 09 agostu, parte rua selebra akordu kooperasaun ba instalasaun cube hause atu fasilita serbisu Agência TATOLI no iha agostu nia laran hahú halo instalasaun, ne’ebé ramata iha novembru.

Seremónia entrega cube house, iha resintu edifísiu Farol, tersa (14/12). Imajen TATOLI/António Gonçalves

Instalasaun ne’ebé feitu ona iha fulan-dezembru nia laran sei akumula ekipa redasaun portál no multimédia.

Daudaun ne’e funsionáriu Agência TATOLI, I.P hosi redasaun no administrasaun hamutuk 73, kompostu hosi Konsellu Diretivu na’in-tolu, fiskál úniku ida, redasaun 44 no administrasaun 25.

Iha loron 07 marsu 2017, liuhosi reuniaun Konsellu Ministru aprova kriasaun Agência TATOLI, I.P nu’udar kontinuasaun hosi kriasaun portál notísia ida http://tatoli.tl, ne’ebé estabelese ho embriaun hanaran ANTIL, hafoin muda naran ba TATOLI.

Objetivu prinsipál husi Agência TATOLI, I.P maka sai fonte informasaun ofisiál, ho produsaun informasaun ba públiku ho eskala nasionál, rejionál no internasionál, ho karakter multikanál, multimédia, multiplataforma no multitarefa.

Jornalista : Arminda Fonseca

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here