Administradór Covalima, Francisco de Andrade, hala’o lansamento distribui ai-mahoni ba to’os-na’in sira atu kuda. Imajen Tatoli/Celestina Teles.

COVALIMA, 14 dezembru 2021 (TATOLI)—Xefe Departamentu Reprezentasaun Territoriál Floresta Planta Indústria Covalima, Francisco Sarmento, hateten Floresta Covalima liuhosi programa viveiru komunitária prontu atu distribui ai-oan ba to’os-na’in sira-ne’ebè iha inisiativa atu kuda ai-oan.

Nia hatutan, Floresta Covalima dezenvolve viveiru komunitária ho objetivu atu ajuda komunidade nune’e sira bele ida-idak iha sira-nia plantasaun rasik.

“Ami-nia programa viveiru komunitária atu prepara ai-oan bainhira ita-nia to’os-na’in sira iha inisiativa atu kuda ai-oan iha sira-nia to’os rasik,” Xefe Departamentu Reprezentasaun Territoriál Floresta Planta Indústria Covalima, Francisco Sarmento hateten liuhosi nia diskursu bainhira iha serimónia lansamentu distribuisaun ai- oan ba to’os-na’in sira iha Suai Loro, Covalima, tersa ne’e.

Nia esplika, durante ne’e floresta Covalima implementa programa viveiru komunitária iha postu administrativu sira hanesan Fatululik, Fatumea, Fohorem, Suai Vila, Zumalai no Maucatar.

Liuhosi programa viveiru komunitária, ami prepara ona ai-oan hanesan iha postu administrative Suai Villa prepara ai-oan 13.000, Fatumea 10.000, Fohorem 20.000, Fatululik 10.000, Zumalai 20.000, Maucatar 10.000 prontu ona atu distribui ba to’os-na’in sira no iha Postu Tilomar laiha tanba implementa programa seluk

Durante ne’e floresta Covalima prepara tipu ai-oan sira hanesan saria, mahoni, ai-kakeu, ai-teka no seluk tán.

Tanba ne’e, nia husu ba autoridade lokál sira bainhira agrikultór atu kuda ai-oan bele kontaktu ho tékniku floresta atu bele distribui ai-oan ba sira hodi bele kuda.

Administradór Munisípiu Covalima, Francisco de Andrade, hato’o agradese ba floresta Covalima ne’ebè mak implementa programa viveiru komunitária hodi distribui ai-oan ba agrikultór sira.

“Ha’u fó hanoin ba to’os-na’in sira bainhira kuda ai-oan tenke iha objetivu ida tenke kuidadu ai-oan atu bele fó rezultadu. Ha’u sei husu relatóriu aí ne’ebè mak kuda nia rezultadu iha ka lae,” nia dehan.

Razaun husu relatóriu tanba tinan-tinan labele kuda de’it ai-oan maibé tenke hatene tuir ai sira-ne’ebè kuda ne’e moris ka lae.

Administradór ne’e mós hato’o parabéns ba agrikultór sira-ne’ebè mak iha inisiativa atu kuda aí oan iha sira nia to’os rasik.

“Ha’u hato’o parabéns ba to’os-na’in sira iha ona inisiativa atu kuda ai-oan. Ita hotu iha  konsiénsia hodi kuidadu ita-nia ambiente,” nia hateten.

Jornalista : Celestina Teles

Editór       : Cancio Ximenes 

PUBLISIDADEiklan

HAKEREK NO HATÁN

Please enter your comment!
Please enter your name here