Diretór Sala Situasaun CIGC, Brigadeiru Jenerál João Miranda 'Aluk', hasai foto hamutuk ho pesoál liña frente sira ne'ebé durante ne'e serbisu ba prevensaun no mitigasaun surtu COVID-19, iha CCD, tersa (14/12). Imajen/Mídia IDN

DILI, 14 dezembru 2021 (TATOLI)—Sala Situasaun, Sentru Integradu Jestaun Krize (CIGC, sigla portugés) deside halo redusaun ba pesoál liña frente ne’ebé durante ne’e presta serbisu prevensaun no mitigasaun surtu COVID-19 hodi hein disolve ofisiál.

Diretór CIGC, Brigadeiru Jenerál João Miranda ‘Aluk’, hateten, bazeia ba lei dehan bainhira iha situasaun emerjénsia no nesesidade atu responde situasaun ida mak bele kria Sala Situasaun, maibé tanba Konsellu Ministru foti desizaun hakotu ona Estadu Emerjénsia, automátikamente Sala Situasaun mós hotu.

“Tanba ne’e Governu halo rezolusaun ida, ne’ebé ekipa dahuluk ami despede ona no ekipa daruak mak foin despede, maibé seidauk ofisiál, maibé Governu seidauk halo desizaun polítiku hodi disolve legalmente Sala Situasaun,” Brigadeiru Jenerál ‘Aluk’, informa, iha Sentru Konvensaun Dili (CCD, sigla portugés), tersa ne’e.

Notísia relevante: Governu deside la renova EE maibé aplika medida esesionál

Maski nune’e, Governu sei husu ekipa ne’e atu asegura nafatin ekipa ne’ebé antes ne’e estabelese ona atu akompaña permanente situasaun pandemia.

“COVID-19 ne’e seidauk lakon loloos, tanba iha nasaun balun númeru sei rejista maka’as, maibé ekipa despede tiha lai no ba kestaun ne’e ami hatama ona proposta ba Governu atu halo seremónia ofisiál disolve Sala Situasaun, maibé Primeiru-Ministru sei okupadu hela ho diskusaun orsamentu 2022 nian ne’ebé seidauk fó resposta,” nia akresenta.

Daudaun ne’e, númeru pesoál sira ne’ebé integra iha Sala Situasaun barak mak despede ona, hela de’it balun hodi hein desizaun hosi Governu.

Jornalista : Antónia Gusmão

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here