Diretor Bee Timor-Leste, Empreza Públika (BTL,EP) Munisípiu Bobonaro, Adriano da Cruz. Imajen Tatoli/Sérgio da Cruz.

BOBONARO, 14 dezembru 2021 (TATOLI) – Diretór Bee Timor-Leste, Empreza Públika (BTL,EP) Munisípiu Bobonaro, Adriano da Cruz, hateten, tempu badak sei halo melloramentu sistema gravitasaun bee-moos urbana hodi garante fornesimentu bee ho kualidade ba konsumidór sira iha munisípiu refere.

Nia informa, dezde sistema gravitasaun bee-moos ne’ebé estabelese iha postu administrativu Maliana hanesan Beremau, Galusapulu, Aikumu, Lugululi, no Atugalai seidauk iha tanke sedimentasaun bee-moos, ho nune’e bainhira tempu udan konsumidór sira sempre konsumu bee-merak.

“Ba futuru BTL,EP liuhosi master plan, ne’ebé mak água de portugál halo hela estudu, ha’u hanoin katak sei estabiliza sistema filtrasaun ka tanke sedimentasaun ida di’ak hodi garante kualidade bee ba iha konsumidór sira,” nia informa ba jornalista sira, iha Jináziu Maliana, tersa ne’e.

Nia haktuir, maske daudaun ne’e komunidade sira kosumu hela bee-merak, maibé BTL,EP nafatin esforsu asegura kualidade bee,  tanba ekipa sira tún ona ba terrenu kahur ai-moruk kloring no kaporit ba bee laran, atu minimiza batéria nune’e labele fó efeitu negativu ba konsumidór sira-nia saúde.

Diretór ne’e akresenta, iha tempu udan sei la fornese bee hosi irrigasaun Malianan I tanba bee-merak, maibé sei utiliza fali ba sistema gravitasaun unidade lima ne’ebé iha rekursu bee boot ho kualidade di’ak no ladún merak.

“Ita-nia bee sira-ne’e depende liubá udan-been, sé udan di’ak kuantidade bee-moos aumenta, sé udan mak la di’ak, dalaruma fulan-juñu to’o jullu sira-ne’e bee laiha ona entaun ita tenke apoiu fali ho irrigasaun Maliana I tanba la maran, ida-ne’e mak tinan tinan ita sempre halo,” nia esklarese.

Maske nune’e BTL, EP mós planu sei halo sensiblizasaun ba konsumidór sira, ne’ebé antes ne’e instala ona metru kontadór iha idak-idak nia fatin, atu nune’e bele iha konxiénsia selu tarifáriu bee, atubele kontribui investimentu taxa naun-migas ba kofre estadu.

“Sensibilizasaun halo beibeik ona, maibé prontu agora BTL,EP sentrál mak halo uluk kona-ba kna’ar BTL,EP nian ba komunidade sira, depois mak ita munisípiu halo fali iha nível suku, zona to’o aldeia sira, ne’ebé sistema urbana eziste ba atu konsiensializa konsumidór sira selu bee-moos, depois sira mós bele hetan bee-moos ho kualidade loron ida dala-rua,” nia dehan.

Enkuantu totál funsionariu BTL, EP munisípiu Bobonaro hamutuk na’in-15, maibé rekursu umanu ne’ebé limitadu la sai obstákulu Diretór BTL. EP Bobobaro ho funsionáriu sira, tanba importante liu mak serbisu tuir regra, hodi fornese bee-moos kualidade ba konsumidór sira.

Jornalista         : Sérgio da Cruz

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here