Autoridade RAEOA hahú instala plaka Toponímia iha zona Pante Makasar. Imajen Tatoli/Abílio Elo Nini.

OÉ-CUSSE, 14 dezembru 2021 (TATOLI) – Autoridade Rejiaun Administrativa Espesiál Oé-Cusse Ambeno (RAEOA), liuhosi Unidade Ordenamentu Territóriu no Kadastrál, hahú konstrui toponímia iha suku lima perténsia sub-rejiaun Pante Makassar.

Prezidente Autoridade RAEOA, Arsénio Paixão Bano, informa, autoridade instala plaka Toponímia ne’e ba faze dahuluk nian, ba suku lima iha sub-rejiaun Pante Makasar, komposta hosi suku Lifau, Nipani Costa, Cunha no Lalisuk.

Nia fó sai katak, projetu Toponímia ne’e dezeña hosi Eis Prizidente Autoridade RAEOA, Mari Alkatiri, ne’ebé konsulta ona atu estabelese plaka Toponímia iha zona sentrál Pante Makasar, kona-ba atu fó naran ba estrada, travessa, avenida, rotunda, ponte no fatin públiku sira, nune’e tinan ne’e autoridade deside reativa.

“Projetu ne’e ita estabelse tanba objetivu atu fasilita sirkulasaun ema, atu hatene no koñese naran arruamentu sira hanesan, avenida, travessa, beko, rotunda sira, ponte inklui fatin públiku sira iha Oé-Cusse vila zona sentrál, hanesan giaun (mata dalan) ba sidadaun estranjeiru no rai laran ne’ebé hakarak vizita Oé-Cusse,” Arsénio Paixão Bano, informa ba Agência Tatoli iha edifísiu ZEESM, tersa ne’e.

Molok instala plaka Toponímia ne’e, autoridade realiza ona diskusaun ho membru konsellu konsultiva sira hosi, xefe suku, jestór, veteran, igreja no eis membru governu, hodi diskute no define ona naran sira ba avenida, travessa, rotunda, ponte inklui fatin públiku sira, atu fó naran bazeia ba naran istóriku, eroi sira iha Timor-Leste nomoos naran kultura Oé-Cusse nian.

“Lansamentu autoridade realiza ona, ita espera empreza ne’ebé sai ezekutadór ba obra hirak-ne’e, bele garante kualidade no lalais, nune’e bainhira situasaun COVID-19 laiha ona no normál hanesan uluk, entaun fasil ona ba ita no ema hotu sei koñese fatin sira iha Oé-Cusse,” nia katak.

Entretantu, projetu ne’e ezekuta hosi empreza Pandi Silnes Unipesoál Lda, ho valór kontratu hamutuk $44,686,83 ne’ebé autoridade aloka hosi Orsamentu Jerál Estadu (OJE) 2021.

Nune’e plaka ba projetu Toponímia iha faze dahuluk hamutuk plaka 287, komposta hosi modelu tolu mak hanesan; plaka arruamentu tipu A ho kuantidade unidade 121 ho valór orsamentu $14,686,83.

Modelu dahuluk plaka ne’e ho sentímentru 0,3, kuantidade unidade sia (9), ho valór orsamentu $1,144,39. Modelu daruak plaka ne’e ho sentímetru 0,2, ho kuantidade unidade 112, ho valór orsamentu $13,542,43.

Purtantu, arruamentu tipu B ho kuantidade unidade 62 ho valór orsamentu $7,713,07. Plaka tipu B ne’e, komposta hosi sentímetru 0,3, kuantidade unidade 16, ho valór orsamentu $2,096,37, modelu daruak hosi plaka ne’e sentímetru 0,2, kuantidade unidade 46 ho valór orsamentu $5,616,70.

Nune’e, ba plaka aruamentu tipu C, ho kuantidade unidade 104 ho valór orsamentu $17,766,59, komposta hosi modelu dahuluk sentímetru 0,3 kuantidade unidade 24, ho valór orsamentu $4,585,02, ho modelu daruak sentímetru 0,2, ho kuantidade unidade 80, ho orsamentu hamutuk $13,181,57.

Notisia relevante: RAEOA aloka $44.986,47 ba projetu Toponímia

Jornalista         : Abílio Elo Nini
Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here