Diretor Ezekutivu Asosiasaun Halibur Defisiénsia Matan Timor-Leste (AHDMTL), Gaspar Afonso.Imajen/Joanico de Araújo.

DILI, 14 dezembru 2021 (TATOLI)—Asosiasaun Halibur Defisiénsia Matan Timor-Leste (AHDMTL) apresia ba deputadu sira iha Parlamentu Nasionál tanba aprova ona subsídiu ba idozu no defisiénsia sira hodi hasa’e ba $50 kada fulan.

“Ami hakarak hato’o ami-nia apresiasaun ba Parlamentu Nasionál ne’ebé ho laran luak bele aprova ona no aumenta orsamentu subsídiu ba ema defisiénsia no idozu sira, tanba ita hatene katak ema ho defisiénsia no idozu sira vulneravel liu satán hasoru pandemia COVID-19. Hosi ne’e, ami agradese tebe-tebes tanba parlamentu sira bele hanoin di’ak no laran luak atu aumenta subsídiu $30 ba $.50 kada fulan. Entaun, ida-ne’e bele responde netik ema ho defisiénsia 38.118 nia nesesidade,” Diretór Ezekutivu Asosiasaun Halibur Defisiénsia Matan Timor-Leste (AHDMTL), Gaspar Afonso, hateten ba jornalista sira iha Edífisiu AHDMTL Manleuana, Dili, tersa ne’e.

Ho subsídiu $50 kada fulan ne’e, parese ema ho defisiénsia no katuas ho ferik sira sente kontente tanba reprezentante povu sira bele hanoin di’ak ba idozu no ema ho defisiénsia sira-nia nesesidade.

“Sira aprova, tanba sira tun ba halo fiskalizasaun ema ho defisiénsia ka ferik ho katuas sira barak mak moris terus. Hanesan, balun hahan laiha no balun uza la to’o, entaun ho aumenta netik $20 kada fulan to’o simu $50 ne’e, ami agradese no apresia. Hosi ne’e, ami apresia mós ba deputadu António Benebides no Mariano “Assanami” Sabinonne’ebé sai proponente ba proposta ida-ne’e. Ita apresia tanba bele hanoin di’ak ba ema barak nia moris di’ak,” nia dehan.

Tanba ne’e, AHDMTL husu mós ba Prezidente Repúblika, Francisco Guterres Lú Olo, bele promulga subsídiu ba idozu no ema defisiénsia, tanba orsamentu no subsídiu ne’e bele responde netik ema ho defisiénsia no ferik ho katuas sira-nia nesesidade.

“Hanesan ami sira ne’ebé bele servisu la preukupa atu sa’e ka tun, maibé ema sira iha foho no área rurál kontente tebe-tebes ho aumenta ba $50,” nia hateten.

Tanba, tinan barak ona sira hein bainhira loos mak subsídiu ne’e bele aumenta, entaun sira ne’ebé iha foho hanesan 12 munisípiu, inklui RAEOA hein hela bainhira loos mak sira simu subsídiu ida-ne’e bele aumenta.

“Nune’e, ami husu atu subsídiu ne’e bele implementa hahú hosi 2022, labele adianta tan tanba ema ho defisiénsia no ferik ho katuas sira hein hela informasaun no implementasaun ba aprovasaun ne’ebé liu ona iha loron hirak liubá,” nia hateten.

Jornalista : Nelia Fernandes

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here