Aimoruk iha SAMES. Imajen Tatoli/Francico Sony

DILI, 13 dezembru 2021 (TATOLI)—Diretora Servisu Saúde Munisípiu Manufahi, Florensia Corterreal Tilman, informa, daudaun uza hela edifísiu polo Universidade Nasionál Timor-Leste (UNTL) sai hanesan armazein ba medikamentu iha munisípiu Manufahi.

“Iha Munisípiu Manufahi rasik ami-nia armazein DHS tuan nia kondisaun la di’ak tanba tempu udan bee tama. Nune’e, ha’u uza edefisiu polo UNTL hodi rai medikamentu sira, hafoin distribui ba sentru saúde no postu saúde sira,’’ Diretora  ne’e hateten ba Agência TATOLI iha salaun FM, Comoro, segunda ne’e.

Iha munisípiu Manufahi iha sentru saúde haat, hanesan sentru internamentu ida, maternidade haat, no postu saúde hamutuk 23. 

Maibé, iha postu saúde lima mak médiku sira laiha hanesan postu saúde Weberek no Ailora iha Allas,postu saúde iha Foholau iha Turiskai, postu saúde Bubulau iha Tutuluro no postu saúde Rotuto.

‘’Iha postu saúde sira ne’e ami tau Enfermeira ida ka parteira ida tanba ami menus rekursu umanu. Minsitériu Saúde halo rekrutamentu ba internatu iha Manufahi, maibé barak liu iha área saúde públiku,” nia akresenta.

Tanba, Saúde Públika ne’e ba halo promosaun edukasaun, la halo atedimentu direta ba pasiente. Enkuantu atende paseinte mak parteira, médiku no enfermeira.

“Ita nia rekursu umanu menus, nune’e sentru saude iha área rurál ne’e ami rasik mak halo tun rasik ba iha ne’ebá kada semana hodi halo atendimentu ba ita-nia komunidade sira,’’Nia informa.

Daudaun, totál profisionál saúde iha munisípiu Manufahi hamutuk 200 resin, kompostu hosi médiku, enfermeiru no parteira.

Jornalista  : Felicidade Ximenes

Editór         : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here