Situasaun debate faze espesialidade, iha sala plenária Parlamentu Naasionál, segunda (13/12). Imajen TATOLI/António Gonçalves.

DILI, 13 dezembru 2021 (TATOLI)—Parlamentu Nasionál iha debate espesialidade ba proposta lei Orsamentu Jerál Estadu (OJE) 2022 aprova orsamentu ho montante inisiál $42,257,061 ba Ministéiru Petróleu no Minerál (MPM) ho votu a-favór 43, kontra 0 no abstensaun 15, no aprova mós orsamentu adisionál millaun $38-resin ba MPM.  

 

“Nune’e Orsamentu Jerál Estadu ba Ministéiru Petróleu no Minerál ho nia alterasaun proposta lima pasa,” Prezidente Parlamentu Nasionál, Deputadu Aniceto Longuinhos Guterres Lopes, deklara iha plenária, segunda ne’e.

Iha proposta númeru 101 títulu (Servisu/Órgaun) Ministéiru Petróleu no Minerál (MPM) kategória despeza transferénsia públika ho programa kódiku 401 kona-ba jestaun rekursu petróliferu no minerál, dotasaun inisiál $41,000.001 iha alterasaun aumenta $30,000.000, nune’e dotasaun finál kategória sa’e ba $71,000.001.

Maibé Governu aseita tuir nesesidade hodi redús alterasaun ba millaun $27,5 no ho orsamentu adisionál ne’e hodi garante funsionamentu MPM iha Timor GAP ba transferénsia públika, hodi kumpre prioridade ba tinan 2022, garante ba kresimentu no sustentabilidade fundu petróleu, redifinisaun no implementasaun estratéjia ba dezenvolvimentu petróleu, gás no rekursu minerál iha territóriu nasionál, realizasaun ba estudu no investimentu iha setór upstream no downstream hosi Timor GAP-EP.

Proposta númeru 102 ho títulu ba kategória despeza no programa hanesan ho adisionál millaun $6 hodi hala’o promosaun ba bloku 18 iha área onshore ho offshore ne’ebé presiza atividade promosaun lubuk ida inklui viajen ba estranjeiru no munisípiu sia no kontinua monitoriza ho hasai lisensa ba atividade downstren no minerál.

Maibé Governu konkorda hodi redús alterasaun fila-fali ba millaun $2,5.

Proposta númeru 103 husu adisionál $300.000 hodi reforsa no aranke ba kompañia mineira.

Ba proposta númeru 104 títulu MPM iha kategória saláriu vensimentu ho programa kódiku 510 kona-ba boa-governasaun no jestaun instituisionál dotasaun inisiál $423.258 ho alterasaun aumenta $100.000, nune’e dotasaun finál sa’e ba $523.258 no orsamentu adisionál ne’e hodi pagamentu ba kargu xefia dirasaun foun tuir organika ministéiru nian ba sekretáriadu Greater sunrise no estabelese ba sekretaridadu ba konsellu Governu rejime espesiál Greater Sunrise.

Proposta númeru 105 títulu MPM kategóra bens no servisu ho programa kódiku 501 boa-governasaun no jestaun instituisionál, dotasaun inisiál $433.719 no alterasaun aumenta $9,963.842 nune’e dotasaun finál sa’e ba $10,397.561 no adisionál ne’e hodi instalasaun arandamentu no akizisaun ba futuru instalasaun hosi MPM no instituisaun sira.

Proposta hirak ne’e mai hosi Maria Angélica Rangel da Cruz hosi (Fretilin), Antoninho Bianco (Fretilin), António da Conceção (PD) ho Maria Angelica Sarmento (PLP).

Ho aprovasaun orsamentu adisionál ne’e no orsamentu inisiál sei iha alterasaun aumenta OJE 2022 ba MPM.

Ministéiru Petróleu no Minerál prevee $42,257,061 hodi aloka ba saláriu vensimentu $453,702, bens servisu $803,358, transferénsia públika $41,000,001, kapitál menór no kapitál dezenvolvimentu laiha.

Hosi orsamentu ne’e sei finansia programa rua, sub-programa walu no atividade 25.

Progama jestaun rekursu petrólifeira no mina-rai prevee $41,400,084 no programa boa-governasaun no jestaun instituisionál prevee $856,977.

Jornalista : Nelson de Sousa

Editór    : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here