Situasaun debate no votasaun OJE 2022 iha faze espesialidade, iha sala plenária Parlamentu Naasionál, segunda (13/12). Imajen TATOLI/António Gonçalves

DILI, 13 dezembru 2021 (TATOLI)—Reprezentante povu iha Parlamentu Nasionál liuhosi diskusaun debate espesialidade ba proposta lei Orsamentu Jerál Estadu (OJE) 2022 aprova orsamentu ba Tribunál Rekursu (TR) ho montante inisiál $7,091,187.

Iha debate ne’e, Parlamentu Nasionál aprova mós proposta orsamentu adisionál $260.000 ne’ebé aprezenta hosi Deputadu Joaquim dos Santos (FRETILIN), Francisco de Vasconcelos (PLP) ho Luis Roberto da Silva (KHUNTO), ho rezultadu votasaun a-favór 46, kontra 0 no abstensaun 14.

“Nune’e Orsamentu Jerál Estadu ba Tribunál Rekursu ho proposta ida pasa,” Prezidente Parlamentu Nasionál, Deputadu Aniceto Longuinhos Guterres Lopes, hateten iha plenária, Parlamentu Nasionál, segunda ne’e.

Iha proposta númeru 106 títulu (Servisu/Órgaun) Tribunál iha kategória despeza kapitál menór ho programa kódiku 510 kona-ba boa-governasaun no jestaun instituisionál, dotasaun inisiál laiha no alterasaun aumenta $260.000.

Hosi orsamentu adisionál ne’e sei halo akizisaun mákina fotokópia rua hodi distribui ba Tribunál Rekursu rasik, akizisaun mákina empresor multifunsaun 20 hodi aloka ba TR, Kámara Konta no Tribunál primeira instánsia, akizisaun kámara Canon hodi suporta servisu mídia Tribunál, akizisaun mobiliáriu no ekipamentu eletróniku seluk tan.

Iha orsamentu tinan 2022 ne’e, TR prevee $7,091,187 ne’ebé aloka ba saláriu vensimentu $3,606,288, bens servisu $2,602,899, kapitál dezenvolvimentu $882,000, kapitál menór no transferénsia públika laiha, no hosi orsamentu ne’e hodi finasia programa tolu, sub-programa 10 no atividade 13.

Programa aproxima servisu Tribunál ba populasaun $4,807,008, programa asesu justisa sei gasta $141,620 no programa boa governasaun no jestaun instituisionál sei gasta $2,142,559.

Programa aproxima servisu Tribunál ba populasaun ho nia sub-programa Tribunál Rekursu ho nia atividade jestuan Tribunál Rekursu.

Sub-programa konsellu superiór majistratura judisiál ho atividade jestaun konsellu superiór majistratura judisiál.

Sub-programa Tribnuál Distritál ho nia atividade jestaun Tribunál Distritál.

Sub-programa lejislasaun no nia atividade diseminasaun lei ne’ebé vigór direitu devér no sidadania.

Sub-programa edifísiu Tribunál nia atividade konstrusaun edifísiu Tribunál.

Sub-programa rekursu umanu afeta prestasaun servisu ho nia atividade jestaun rekursu umanu.

Aleinde ne’e, programa asesu justisa ho objetivu médiu prazu sidadaun hotu iha asesu no kuiñesimentu kona-bá sistema justisa.

Ninia sub-programa dezenvolvimentu rekursu umanu iha área tékniku espesífika no atividade formasaun ba autór justisa.

Purtantu, programa boa-governasaun no jestaun instituisionál ho nia  sub-programa tolu no atividade neen.

Jornalista : Nelson de Sousa

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here