Foer ne'ebé komunidade soe arbiru iha área dalan públiku diresaun rotunda Vila Nova, Nagardjo, Baucau, Imajen Tatoli/Natalino Belo.

BAUCAU, 13 dezembru 2021 (TATOLI) – Prezidente Autoridade Munisipál (PAM) Baucau, Olívio ‘Bou-Lesa’ Freitas, husu komunidade atu iha konxiénsia soe lixu iha fatin ne’ebé prepara ona.

“Fatin lixu iha, pesóal soe ne’e presiza iha konxiénsia, bainhira soe arbiru la sente responsáblidade ba aan katak rai ne’e ninian,” Bou Lesa hateten iha Sentru Konvensaun Baucau (CCB, sigla Portugés), segunda ne’e.

Foer ne’ebé naklekar iha area Watulete, Vila Nova Baucau. Imajen Tatoli /Natalino Belo.

Nu’udar PAM iha dever atu fó hanoin nafatin ba ema hotu-hotu atu labele soe lixu arbiru tantu iha uma no fatin públiku tanba tenke soe tuir lixu fatin ne’ebé prepara ona.

“Ita tenke muda aan tantu idozu, joven no labarik tenke aprende saida mak fatin lixu hodi soe foer ba, tenke aprende ona agora la’ós PAM tenke aviza beibeik,” Bou Lesa enkoraja.

Munisípiu Baucau prepara pesóal saneamentu na’in-20 iha fatin rua hanesan Vila Nova no Vila Antiga hodi raut foer kada loron ba soe iha fatin destinasaun.

“Komunidade Baucau mak tenke hatene katak ema na’in-20 tenke mesak responsável ba lixu iha Baucau, bainhira halibur ona karreta sei ba tula maibé labele soe iha dalan de’it,” Bou Lesa akresenta. 

PAM konsidera komersiante hanesan loja na’in sira kontribui másimu ba lixu iha Baucau tanba sasán ne’ebé la utiliza hanesan dós, ákua, plástiku soe arbiru iha dalan públiku. 

Fo’er ne’ebé komunidade soe arbiru iha área dalan públiku diresaun rotunda Vila Nova, Nagardjo, Baucau. Imajen Tatoli/Natalino Belo.

Entretantu, Dekretu-Lei kona-ba ijiene no orden públika númeru 33/2008 prevista katak aplika multa ka koema ba ema sira-ne’ebé soe lixu ka foer la tuir fatin (infratór) hosi $5 to’o $500 tanba seidauk defini loloos entaun fó impkatu ba ambiente iha sidade laran.

Mesmu nune’e, PAM rasik sei aplika multa ba pesóal no komersiante sira liuliu loja na’in sira iha Baucau.

Tuir observasaun Agência TATOLI iha terrenu, nota katak, foer kuaze namkari iha sidade Baucau hosi diresaun Vila Nova to’o Vila Antiga inklui iha estrada protokolu diresaun Baucau mai Dili nian.

Jornalista         : Natalino Belo

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here