Situasaun debate no votasaun OJE 2022 iha faze espesialidade, iha sala plenária Parlamentu Naasionál, segunda (13/12). Imajen TATOLI/António Gonçalves

DILI, 13 dezembru 2021 (TATOLI)– Parlamentu Nasionál aprova Orsamentu Jerál Estadu (OJE) 2022 ba Ministériu Interiór (MI) ho montante $22,678,467 iha espesialidade ho votu a-favor 49, abstensaun 14 no kontra 0.

“Nune’e, orsamentu ba Ministériu Interiór ho nia alterasaun sira aprovadu,” Prezidente Parlamentu Nasionál, Deputadu Aniceto Longuinhos Guterres Lopes, informa iha sala plenária Parlamentu Nasionál, segunda ne’e.

Hosi orsamentu ne’e alokadu fahe ba kategoria salariu no vensimentu $10,362,308, bens no servisu $6,081,604, kapitál menór $3,965,000, kapitál dezenvolvimentu $1,653,690 no trasferénsia públika $615,865.

Iha biban hanesan, Sekretária Estadu Protesaun Sivíl, Joaquim Gusmão, agradese ba Parlamentu Nasionál liuhosi komisaun B ne’ebé trata asuntu defeza no seguransa tanba bele hatama ona proposta hodi aumenta orsamentu ba SEPS atu hala’o serbisu di’ak liután iha tinan 2022.

“Proposta sira ne’e pretenente tebes mai ami hodi bele mellora serbisu hodi halo atendimentu di’ak liu ba ita nia komunidade-sira  ne’ebé afetadu ba dezastre naturál,” nia agradese.

Haree ba orsamentu hirak ne’e ladun sufisiente ba Ministeriu Interiór no Sekretária Estadu Protesaun Sivil (SEPS), nune’e Deputadu sira iha komisaun B ne’ebé trata asuntu defeza no seguransa hatama proposta hodi husu orsamentu adisionál.

Proposta hirak ne’e mak hanesan, proposta númeru 83 ho titulu Ministeriu Interiór kategoria despeza, salariu no vensimentu iha programa ho kódigu 366 kona-ba seguransa nasionál, ho dotasaun inisiál $8,370,320 hetan alterasaun hodi aumenta $195.039, nune’e dotasaun finál sa’e ba $8.565.359.

Orsamentu adisionál ne’e submete ba Sekretária Estadu Protesaun Sivil (SEPS) hodi halo rekrutamentu koordenador dezastre hamutuk 67 ba postu administrativu-sira no apoiu finanseiru ba funsionáriu iha rejime turnu ne’ebé hala’o serbisu iha sede sentru operasaun dezastre.

Nune’e mós proposta 86 kona-ba kategoria bens no servisu  iha alterasaun aumenta $29.645 hodi aloka ba SEPS hala’o sensibilizasaun informasaun ba autór save implementasaun iha komunidade nivél nasionál no lokál kona-ba planu asaun nasionál (PAN 1325) rezolusaun konsellu seguransa Nasaun Unida no sensibilizasaun informasaun PAN ba diresaun iha Ministériu.

Proposta 87 ho kategoria despeza bens no servisu iha mós  alterasaun aumenta $3,538,076, ho orsamentu adisionál ne’e aloka ba SEPS hodi atende viajen lokál nesesáriu ba programa distribuisaun materiál konstrusaun vitíma dezastre iha munisipiu, liña komunikasaun internet iha sentru operasaun dezastre no halo akizasaun apoia vitima dezastre naturál.

Propsta 88 kategoria despeza transferensia públika ho alterasaun aumenta $2,384,135, adisionál ne’e kobre ba SEPS   atu apoia funsionáriu hodi hala’o serbisu no responde orsamentu mão de obra ho transporte ba família vitíma dezastre naturál.

Entretantu, proposta 89, kona-ba kategoria despeza kapitál menor ho alterasaun aumenta adisionál $1,373,500, hodi aloka ba SEPS atu sosa veíkulu espesializadu ho totál unidade tolu ba Munisipiu Manatutu, Liquiça no Ermera. Halo mós akizasaun sistema alerta iha Dili, ekipamentu espesifiku hanesan kontentór desmontave hodi distribui ba nivél nasionál 12, lokál 26 no seluk tan.

Jornalista : Hortencio Sanchez

Editór        : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here