Situasaun debate faze espesialidade, iha sala plenária Parlamentu Naasionál, segunda (13/12). Imajen TATOLI/António Gonçalves

DILI, 13 dezembru 2021 (TATOLI)—Parlamentu Nasionál liuhosi debate espesialidade proposta lei Orsamentu Jerál Estadu (OJE) 2022 aprova orsamentu $4,471,000 ba Servisu Apoiu Sosiedade Sivíl no Auditória Sosiál (SASCAS, siglá portugés) ho votu a-favór 46, kontra 0 no abstensaun 10.

 

“Nune’e Orsamentu Jerál Estadu ba Servisu Apoiu Sosiedade Sivíl no Auditória Sosiál pasa,” Prezidente Parlamentu Nasionál, Deputadu Aniceto Longuinhos Guterres Lopes, deklara liuhosi plenária, segunda ne’e.

Orsamentu ba tinan 2022 ne’e sei aloka ba bens servisu $ 471,000, transferénsia públika $4,000,000, saláriu bensimentu, kapitál menór no kapitál dezenvolvimentu laiha. hodi finansia programa rua sub-programa haat no atividade neen.

 Programa boa-governasaun no jestaun instituisionál prevee $471,000 no programa igualidade jéneru no inkluzaun sosiál prevee $4,000,000.

Papél SASCAS, integra iha administrasaun direita sentrál Estadu, dotadu autonomia administrativa no finanseira, dirije hosi Diretór Ezekutivu ida sujeitu Dirasaun Primeiru-Ministru.

SASCAS iha misaun presta apoiu tékniku no administrativu hosi Primeiru-Ministru iha exersísiu kompeténsia iha matéria fortalesimentu instituisionál no apoiu organizasaun sosiedade sivíl.

Hosi orsamentu ne’e haree ba la sufisiente nune’e, PN aprova mós proposta lima ne’ebé aprezenta hosi deputadu Francisco de Vasconselo (PLP), Luis Roberto (KHUNTO) ho Joaquim dos Santos (FRETILIN).

Proposta númeru 110 títulu (Servisu/Órgaun) Servisu Apoiu Sosiedade Sivíl no Auditória kategória despeza bens servisu iha programa kódiku 501 kona-ba boa-governasan no instituisionál, dotasaun inisiál $471.000 alterasaun aumenta $400.000, nune’e dotasaun finál sa’e ba $871.000 hodi rekruta diretór ezekutivu no adjuntu ho funsionáriu kazuál ba kontrola projetu subvensaun públika.

Proposta númeru 111 kategória despeza kapitál menór ho programa boa-governasaun no instituisionál, dotasaun inisiál laiha no alterasaun aumenta $100.000, ho aditamentu ne’e atu sosa viatura, komputadór no ekipamentu materiál eskritóriu.

Proposta númeru 113 kategória despeza transferénsia públika ho programa kódiku 980 kona-ba igualidade jéneru no inkluzaun sosiál, dotasaun inisiál $4.000.000 ho alterasaun aumenta $100.000 nune’e dotasaun finál $4,100.000.  Hosi aditamentu orsamentu ne’e hodi apoiu ba konstrusaun kapela iha postu administrativu Tilomar, munisípiu Cavalima.

Proposta númeru 114 kategória despeza transferénsia públika ho programa igualidade jéneru no inkluzaun sosiál, dotasaun inisiál $4,000.000 ho alterasaun aumenta $5000.000 nune’e dotasaun finál $9,000.000. Aditamentu rubrika ne’e apoiu $1,000,000,00 ba organizasaun rezisténsia liu hosi Konsellu Kombatente Libertasaun Nasionál no $4.000,00 ba reforsu apoiu igreja la’ós katóliku.

Iha proposta númeru 112 ne’ebé aprezenta hosi Abel Pires (PLP), Alexandrino C. Cruz (FRETILIN), António Verdiál (KHUNTO), Carmelita Caetano Moniz (CNRT), no proposta ne’e iha kategória despeza kapitál dezenvolvimentu ho programa boa-governasaun no jestaun instituisional, dotasaun inisiál laiha no alterasaun aumenta $80.000, ne’ebé atu hala’o konstrusaun moru iha igreja Ave Maria Suai iha munisípiu Covalima.

Jornalista : Nelson de Sousa

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here