Situasaun debate no votasaun OJE 2022 iha faze espesialidade, iha sala plenária Parlamentu Naasionál, segunda (13/12). Imajen TATOLI/António Gonçalves

DILI, 13 dezembru 2021 (TATOLI)—Deputadu sira iha Parlamentu Nasionál liuhosi diskusaun espesialidade ba proposta lei Orsamentu Jerál Estadu (OJE) 2022 aprova orsamentu ba instituisaun tolu Provedória Direitu Umanu no Justisa (PDHJ), Inspesaun Jerál Estadu (IJE) ho Polísia Sientífika Investigasaun Kriminál (PCIC).

PN aprova orsamentu ba PDHJ ho montante $1,697,168 ho votu a-favór 51, kontra 0 no abstensaun sia, orsamentu ba IJE ho montante $932,054, aprova votu a-favór 47, kontra 0 no abstensaun 13, no orsamentu ba PCIC hamutuk $1,658,163, ho votu a-favór 51, kontra 0 no abstensaun sia.

“Nune’e orsamentu ba PDHJ, IJE, PCIC ho votasaun halo ida-idak tuir instituisaun pasa,” Prezidente Parlamentu Nasionál, Deputadu Aniceto Longuinhos Guterres Lopes, deklara iha plenária, segunda ne’e.

Hosi orsamentu ba PDHJ ne’e aloka ba saláriu bensimentu $951,286, bens servisu $720,882, kapitár menór $25,000, kapitál dezenvolvimentu no transferénsia públika laiha, ne’ebé sei finasia programa rua, sub-programa hitu no atividade 21.

Programa direitu umanu no boa-governasaun prevee $193,024 no programa boa-governasaun no jestaun instituisionál prevee $1,504,144.

Orsamentu tinan 2022 ba IJE ne’e sei aloka ba saláriu vensimentu $339,203, bens servisu $592,851, kapitál menór, kapitál dezenvolvimenu ho transferénsia públika laiha ne’ebé se finasia programa ida mak boa-governasaun no jestaun instituisionál, sub-programa rua no atividade neen.

Montante orsamentu PCIC ba tinan oin aloka ba saláriu vensimentu $1,187,588, bens servisu $458,075, kapitál menór $12,500, kapitál dezenvolvimentu no transferénsia públika laiha ne’ebé sei finansia programa rua, sub-programa rua no atividade lima.

Programa asesu justisa prevee $1,502,517 ho progama boa-governasaun no jestaun instituisionál prevee $155,646, maibé haree ba orsamentu ne’e la sufisiénte ba PCIC.

Nune’e, PN aprova mós proposta númeru 109 títulu (Servisu/Órgaun) PCIC iha kategória despeza kapitál menór ho programa kódiku 510 kona-ba boa-governasaun no jestaun instituisionál, dotasaun inisiál laiha ho alterasaun aumenta tan $137,097.73.

Hosi orsamentu adisionál ne’e sei halo akizisaun ekipamentu utiliza ba servisu investigasaun kriminál ho sira seluk tán

Jornalista : Nelson de Sousa

Editór        : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here