Situasaun debate faze espesialidade, iha sala plenária Parlamentu Naasionál, segunda (13/12). Imajen TATOLI/António Gonçalves.

DILI, 13 dezembru 2021 (TATOLI)—Parlamentu Nasionál liuhosi debate espesialidade ba proposta lei Orsamentu Jerál Estadu (OJE) 2022 aprova orsamentu ba Prokuradória Jerál Repúblika (PGR) ho montante inisiál $4,087,573 ho votu afavór-47, kontra 0 no abstensaun 13.

“Nune’e Orsamentu Jerál Estadu ba Prokuradória Jerál Repúblika ho proposta alterasaun rua pasa,” Prezidente Parlamentu Nasionál, Deputadu Aniceto Longuinhos Guterres Lopes, anunsia liuhosi plenária, PN, segunda ne’e.

PN aprova mós proposta rua ne’ebé aprezenta hosi deputadu proponente Joaquim do Santos (FRETILIN), Francisco de Vasconselho (PLP) no Luis Roberto (KHUNTO).

Proposta númeru 107 títulu (Servisu/Órgaun) PGR iha kategória despeza bens no servisu ho programa kódiku 510 kona-ba boa-governasaun no jestaun instituisional, dotasaun inisiál $1,087,377 no alterasaun aumenta $130.000 nune’e dotasaun finál sae ba $1,217,377.

Aditamentu rubrika ne’e atu halo manutensaun edifísiu rezidénsia prokuradór distritál Baucau, Viqueque, Ermera no RAEOA, no mós fornesimentu apoiu servisu operasionál ho deslokasaun ba estranjeiru partisipa enkontru annual Ministéiru Públiku.

Proposta númeru 108 iha kategóra kapitál menór ho programa kódiku 510 kona-ba boa-governasaun no jestaun instituisional dotasaun inisiál laiha ho alterasaun aumenta $198.000, no aditamentu ne’e hodi halo akizasaun ekipamentu eletróniku, mobiliáriu no ekipamentu bee, no sosa karreta prado ida ho kusta $65.000 ba adjunta PGR.

Orsamentu ba tinan 2022, Prokuradória Jerál Repúblika (PGR) prevee $4,087,573 hodi aloka ba saláriu vensimentu $2,480,498, bens servisu $1,206,475, kapitál dezenvolvimentu $400,600, kapitál menór no transferénsia públika laiha, no hosi orsamentu ne’e sei finansia programa rua, sub-programa lima no atividade sia.

Programa asesu justisa prevee $2,677,930 ho programa boa-governasaun no jestaun instituisional prevee $1,409,643.

Programa asesu justisa ho sub-programa edifísiu públiku no nia atividade konstrusaun edifísiu Gabinete Kombate Korrupsaun, konstrusaun edifísiu prokuradória distritál.

Sub-programa jestaun prosesu krime nia atividade mak julgamentu no notifikasaun, sensevilizasaun lei, notifikasaun no partisipasaun iha julgamentu krime móvel ho espesiál krime hasoru labarik no violénsia bazea ba jéneru.

Sub-programa dezenvolvimentu rekursu umanu iha área téknika espesífika ho atividade formasaun profisional iha área justisa.

Entretantu, programa boa-governasaun no jestaun instituisional ho sub-programa rua no atividade rua.

Jornalista : Nelson de Sousa

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here