Ministra Saúde, Odete Maria Freitas Belo, hare diretamentu ekipamentu edifísiu foun Emerjénsia Sentru Saúde Comoro, loron sexta (01/10). Imajen Tatoli/Francisco Sony

DILI,13 dezembru 2021 (TATOLI)— Ministra Saúde, Odete Maria Freitas Belo, hateten, ho alokasaun Orsamentu Jerál Estadu (OJE) 2022, MS fó prioridade ba kuidadu saúde primária.

“Prioritiza programa kuidadu saúde primária nian no la ses mós hosi kuidadu saúde sekundária  iha tempu situasaun COVID-19. Hakarak ka lakohi ita tenke foku liubá iha kuidadu saúde primária,’’ Ministra Odete, hateten iha salaun Madre FMA,Comoro-Dili, segunda ne’e.

Tuir Ministra katak, kuidadu saúde primaria iha folin liu tanba halo prevensaun duké halo tratamentu.

Nune’e,  MS tau nafatin polítika saúde nian hodi tau-matan ba iha serbisu kuidadu saúde primariu no kuidadu saúde sekundáriu no seluk tan.

Iha tinan 2020, MS halo konstrusaun postu saúde sia no halo ona uma ba médiku sira hodi hela besik komunidade atu fó tratamentu saúde ne’ebé di’ak.

“Iha tinan 2022, ita kontinua nafatin atividade konstrusaun ba postu saúde sira iha munisípiu sira atu fó atendimentu saúde ho kualidade ba populasaun sira,’’ nia garante.

Entertantu, Parlamentu Nasionál aprova Orsamentu Jerál Estadu (OJE) 2022 ho montante $52,113,565 ba Ministériu Saúde iha espesialidade ho votu afavór 41 abstensaun 21 no kontra 0.

Hosi totál ne’e aloka ba kategoria saláriu vensimentu $24,633,600, bens no servisu $13,564,957, kapitál menór $41,000,005, kapitál dezenvolvimentu $1,916,203, transferénsia públika $10,998,800.

Orsamentu ne’e sei finansia ba programa tolu, sub-programa 19 no atividade 69 ne’ebé alokadu ba programa governasaun di’ak no instituisionál prevee $8,548,068, programa saúde alokadu $43,563,497 no igualidade jenéru no inkluzaun sosiál prevista $2,000.

Notísia Relevante: PN aprova OJE 2022 ba MS iha espesialidade

Jornalista : Felicidade Ximenes

Editór       : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here