Jornalista Max Stahl (hatais kalsa badak) ho nia kamera leno hela ba alvu. Imajen/Facebook: Kristy Sword Gusmão

DILI, 13 dezembru 2021 (TATOLI)–Prezidente Komisaun Organizadora ba Preparasaun simu Saudozu Max Stahl nia sinza, Silveiro Pinto, hateten, preparasaun simu sinza la’o daudaun no sei simu direta hosi líder istóriku.

Saudozu Max Stahl nia sinza sei to’o iha loron 15 dezembru iha Aeroportu Internasionál Nicolau Lobato, Comoro, Dili, tuku 12:00, ne’ebé akompaña hosi Saudozu nia espoza ho nia oan na’in-lima.

“Bainhira aviaun lori sinza to’o mai iha Aeroportu Comoro, família sei entrega ba Xanana no Ramos Horta, inklui membru Governu sira hanesan Sekretáriu Estadu Asuntu Kombatente Libertasaun Nasionál, Gil da Costa Monteiro ‘Oan Soru’, Prezidente Konsellu Kombatente Libertasaun Nasionál, Vidal de Jesus ‘Riak Leman’, no Ministru Prezidénsia Konsellu Ministru, Fidelis Manuel Leite Magalhães,” Prezidente Komisaun informa ba Agência TATOLI, foin lalais ne’e, iha nia knaar fatin, Caicoli.

Notísia relevante: Ramos Horta: Max Stahl sempre iha Povu Timor-Leste nia fuan

Hafoin simu hotu sei taka Bandeira RDTL ba saudozu nia sinza no lia-na’in sira sei tuir kultura Timór nian, ne’ebé bolu ‘Sargala ka hamulak’.

Objetivu Komisaun Organizadora hili Xanana no Ramos Horta nia prezensa iha Aeroportu atu simu sinza Max Stahl, tanba Komité Ezekutivu 12 Novembru rasik mak haruka komisaun hato’o karta ba líder istóriku rua ne’e atu partisipa iha seremónia.

“Ramos Horta ninia prezensa simu sinza, hanesan reprezenta Frente Diplomátiku tanba rezultadu hosi Saudozu Max Stahl nia servisu iha loron 12 novembru 1991, hoti filmajen iha Santa Cruz no divulga ba rai-li’ur, Ramos Horta momentu ne’ebá hanesan Diplomata halo kampaña asuntu Timór iha li’ur,” nia akresenta.

Nune’e, Komité 12 Novembru husu mós Xanana Gusmão nia prezensa iha Aeroportu Comoro, tanba hanesan Komandu luta iha momentu luta, tuir istória 09 to’o 11 novembru, Saudozu Max Stahl nia paradeiru iha Baucau hasoru hela komadante Daitula sira, maibé tanba orden hosi Komandu Luta Xanana mak loron 11 novembru 1991 nia desloka hosi Baucau mai Dili hodi prepara halo kobertura ba manifestasaun pasífika.

“Nune’e Xanana no Ramos Horta sira-nia prezensa iha Aeroportu Comoro laiha intensaun polítika, maibé atu reprezenta de’it frente Armada, Klandestina no Diplomasia,” nia dehan.

Bainhira lia-na’in sira simu hotu ho kultura mak sei entrega ba parada Militár FALINTIL-Forsa Defeza Timor-Leste (F-FDTL).

“Parte parada Militár simu hotu sinza no sei lori sai hosi Aeroportu tula ho Ramos Horta nia karreta, nia rasik lori tanba atu tau ambulánsia família la hatan,” Prezidente Komisaun tenik.

Bainhira lori sai hosi Aeroportu, iha dalan komunidade sei hamriik hodi simu no halo komboiu hahú hosi Aeroportu kona-ba tasi ibun to’o Becora, Taibesi tun Balide, to’o Komité 12 Novembru para oituan hodi fó omenajen, hotu kontinua mai iha Katedrál no ikus mai para iha Centro Audivisual Max Stahl (CAMTL) nian.

Sinza sei haloot iha Santa Cruz

Prezidente Komisaun dehan, sinza Saudozu Max Stahl husi durante loron rua loron tolu, hahú hosi 15-17 dezembru hafoin mak haloot.

Nune’e, iha loron 15 dezembru sei presta omenajen, hahú hosi orgaun soberanu sira, liña ministeriál, sosiedade sivíl inklui estudante hosi universidade sira.

Iha loron 16 dezembru sei iha atividade konta istória hosi ema sira ne’ebé uluk iha komunikasaun ho Max Stahl.

Iha loron 17 dezembru dadersan, sei lori sai hosi CAMTL ba Motael halo misa ikus nian ne’ebé planu sei prezide hosi Arsebispu Arkidioseze Metropilitana Dili, Don Virgílio do Carmo da Silva, tanba hato’o ona karta, misa hotu sei la’o ain ba to’o semitériu Santa Cruz hodi haloot.

Sinza Saudozu Max Stahl sei haloot iha Simitériu Santa Cruz, ne’ebé hanesan fatin akontese Masakre Santa Cruz 1991, no fatin hakoi ka subar rollu ne’ebé mak nia hasai foto no video, atu Militár indonéziu labele foti.

“Saudozu nia rate ka kampa fatin ne’e tau iha simitériu Santa Cruz, ohin hahú halo ona servisu, empreza halo dezeñu ba Saudozu nia kampa, halo kompleta númeru 12/11/1991, entaun númeru sira ne’e ita hatama hotu iha rate nia medida,” nia hateten.

Orsamentu ne’ebé prepara ba prosesu Max Stahl nian, Governu prevee labele liu $60.000.

“Maibé hafoin ami halo kontajen ba prosesu sira ne’e, billete hosi família saudozu na’in-neen, haat hosi Austrália no rua hosi Inglatera hamutuk mai $35.000, kustu ne’ebé família prepara halo kremasaun ba saudozu iha Austrália besik $9.000,” Prezidente Komisaun dehan.

Orsamentu ba Komisaun Organizadora ne’ebé presiza hamutuk $100.000, tanba orsamentu sira ne’e sei halo kondekorasaun ba CAMTL, tanba fatin ne’e sei hetan vizita hosi ezekutivu VIP sira hahú hosi orgaun soberanu to’o organizasaun rezisténsia sira hotu.

“Durante família Saudozu iha Timor-Leste, ita mak sei haree tanba durante saudozu moras nia fa’an hotu nia riku-soin sira ne’e hodi halo ba tratamentu saúde, maibé osan limitadu, entaun sei hamenus iha konsumu ba almosu nian iha Santa Cruz bainhira haloot,” nia informa.

Komisaun Organizadora ba prosesu simu sinza Saudozu Max Stahl, kompostu hosi liña ministeriál sira hanesan Ministériu Asuntu Kombatente Libertasaun Nasionál (MAKLN), Ministru Negósiu Estranjeiru no Kooperasaun (MNEK), Ministériu Administrasaun Estatál (MAE), Konsellu Kombatente Libertasaun Nasionál.

Nune’e, organizasaun autónomu sira, sosiedade sivíl sira hanesan 12 Novembru ho nia jerasaun sira, Conselho de Imprensa, Centro Nascional Chega, inklui CAMTL.

“Maibé jere ba atividade ne’e Konsellu Ministru hili MAKLN mak lidera orsamentu ba prosesu Max Stahl nian,” nia tenik.

Christopher Wenner, koñesidu liu ho naran Max Stahl, moris iha Reinu Unidu iha loron 06 dezembru 1954, hanesan responsável ba filmajen no imajen Masakre Santa Cruz, ne’ebé akontese iha loron 12 novembru 1991.

Max Stahl, hakotu iis iha loron 28 outubru, iha Brisbane, tanba moras ne’ebé nia sofre kleur ona.

Jornalista : Arminda Fonseca

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here