Kompañia hahú konstrui edifísiu administrasaun postu Maliana

BOBONARO, 13 dezembru 2021 (TATOLI) –Kompañia Lesu Boro, Unipessoal Lda, hahú konstrui edifsíu foun administrasaun postu administrativu Maliana, munisípiu Bobonaro.

Obra ne’e Kompañia Leso Boro, Unipessoal Lda hetan liuhosi Projetu Dezenvolvimentu Integradu Munisipál (PDIM)  ho montante orsamentu $141,708.07 ho durasaun fulan-lima, hahú 19 novembru 2021 no sei finaliza iha loron 21 abríl 2022. Edifísiu ne’e ho medida 24X15 ne’ebé lokaliza iha área suku Holsa, postu administrativu Maliana, munisípiu Bobonaro.

Diretór Kompañia Leso Boro, Unipessoal Lda, Afonso Lelo, informa, projetu ne’e asina kontratu serbisu ho governu iha loron 19 novembru, maibé serbisu foin la’o semana ida tanba sei fó tempu ba administrasaun postu Maliana prepara fatin provizóriu ba hodi halo serbisu.

“Semana ne’e ita hahú sobu tiha edifísiu nia kalen no atap, agora komesa lori fali ekipamentu mai sobu ona uma tuan ne’e nune’e aban ita bele tau ona estaka, depois ba oin ne’e ita bele aselera serbisu la’o lais liután tanba tempu udan,” nia informa ba Agência Tatoli, iha administrasaun postu Maliana, segunda ne’e.

Nia dehan maski projetu ne’e implementa iha tempu udan nia laran, maibé hanesan empreza lokál no Bobonaro oan sei garante finaliza obra refere tuir kontratu serbisu ho governu durasaun tempu fulan-lima.

“Ita-nia materiál kompletu hela, agora traballadór sira mós preparadu ona, ami iha esperansa sei finaliza obra ne’e ho kualidade tuir dezeñu ne’ebé governu fo mai ami,” nia dehan.

Entretantu, Administradór Postu Administrativu Maliana, Tomás Laco-Loe, hateten maske edifísiu foun iha hela faze konstrusaun, maibé  halo atendimentu administrasaun ba komunidade Maliana kontinua la’o.

“Ha’u husu ba komunidade Maliana, ba estudante sira-ne’ebé atu trata dukumentu, no hetan asinatura hosi ha’u bele ba fali iha eis administrasaun munisipál tuan, iha besik sede suku Holsa nia oin tanba provizóriu kompañia sei halo konstrusaun foun,” nia katak.

Jornalista         : Sérgio da Cruz

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here