Ministra Saúde, Odete Maria Freitas Belo, Rreprezentante JICA Ko Goto, hala'o observasaun direta ba veikulu ho marka Fuso sira ne'ebé oferese hosi JICA. Iha salaun madre FMA comoro, segunda (13/12). Imajen Tatoli/Egas Cristovão

DILI, 13 dezembru 2021 (TATOLI)—Ajénsia Kooperasaun Internasionál hosi Japaun (JICA, sigla inglés) liuhosi Governu Japaun apoia karreta box no forklift hamutuk 15 ba Ministériu Saúde liuhosi Servisu Autónomu Medikamentu no Ekipamentu Saúde (SAMES) atu fasilita tula aimoruk hosi nasionál ba munisípiu-sira.

“Ajudu ne’e ho objetivu kapasita prestasaun servisu saúde nian no mós responde COVID-19 iha Timor-Leste, ho hanoin haforsa prestasaun servisu médiku sein iha sistema kadeia ba abastesementu iha Ministériu Saúde no hametin liután kooperasaun entre Governu Japaun no Timor-Leste iha servisu hamutuk prevene COVID-19,’’ Reprezentante JICA iha Timor-Leste, Goto Ko, iha serimonia apoia veíkulu ba MS iha salaun madre FMA, Comoro-Dili, segunda ne’e.

Veíkulu 15 ne’e komposu hosi karreta mini truk ho marka fuso ualu, truk nato’on tolu, forklift tolu, no kareta tula vasina nian ida ne’ebe sosa  ho orsamentu rihun $700.

Reprezentante JICA iha Timor-Leste, Goto Ko. Imajen/ Egas Cristivão.

Nia husu ba Governu Timor-Leste atu uza karreta no halo manutensaun ho di’ak atubele uza ba tempu naruk liuliu fó benefisiu ba povu Timor-Leste.

Governu japaun liuhosi JICA kontinua mantein kooperasaun iha área kapasidade rekursu umanu liuhosi programa bolsu estudu ba funsionáriu timór-oan ba estuda iha Japaun no oferese treinamentu ba médiku sira no funsionariu administrasaun sira.

“Hau’ hakarak atu hatete JICA sei kontinua serbisu hamutuk ho Governu Timor-Leste hodi habelar tan kooperasaun iha setór saúde. Tanba ha’u fiar katak ho serbisu hamutuk mak hadi’a liután timór-oan barak atu asesu ba serbisu saúde ho kualidade,’’ nia afirma.

Iha biban hanesan, Minsitra Saúde, Odete Maria Freitas Belo, hato’o agradesementu ba Governu Japaun liuhosi Ajénsia JICA tanba bele fasilita distribui aimoruk ba munisípiu sira.

Diretór Kuartél Jerál Pasifiku no Sudeste Aziatiku Divizaun 6 JICA, Tamio Shinya entrega simbolika xave ba Ministra Saúde no Diretór Ezekutivu SAMES. Imajen/ Egas Cristivão.

“Ita hetan apoia veíkulu ne’e no sei oferese truk box balun ba munisípiu atubele ajuda lori aimoruk bainhira SAMES distribui ba munisípiu atu sira distribui tutan ba iha sentru saúde no postu saúde,’’ Ministra Saúde ne’e afirma.

Entretantu, Diretór Ezekutivu Servisu Autónomu Medikamentu no Ekipamentu Saúde, Santana Martins mós agradese ba Governu Japaun liuhosi JICA ne’ebé apoia veíkulu hodi ajuda SMAES halo distribuisaun aimoruk ba 12 munisípiu inklui Rejiaun Administrativu Espesiál Oé-cusse no Ambeno (RAEOA).

“Ami orgullu tebes tanba apoia ne’e atubele asegura medikamentu sira bá iha munisípiu liuliu ba postu no sentru saúde sira”, nia esplika.

Jornalista : Felicidade Ximenes

Editór      : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here