Prezidente Repúblika, Francisco Guterres Lú Olo, simu karta kredensiál hosi Embaixadór Indonesia iha Timor-Leste, Okto Dorinus Manik iha Palásiu Prezidente Nicolau Lobato, Bairru Pité. segunda (13/12). Imajen/Egas Cristovão

DILI, 13 dezembru (TATOLI)-Prezidente Repúblika, Francisco Guterres Lú-olo, ohin, simu karta kredensiál hosi Embaixadór Indonézia iha Timor-Leste, Okto Dorinus Manik, iha Palásiu Prezidensiál, Bairru Pité.

Ministra Negosiu Estranjeiru no Kooperasaun (MNEK), Adaljiza Magno, akompaña Xefe Estadu hodi simu karta kredensiál hosi Embaixadór Indonézia no hato’o mensajen hosi Prezidente Indonézia, Joko Widodo ba Xefe Estadu hodi hametin liután lasu kooperasaun entre nasaun rua iha área komérsiu.

“Embaixadór Indonézia foun mai Timor-Leste Okto Dorinus Manik, aprezenta karta kredensiál ba Prezidente Repúblika hodi kompremete hametin liután kooperasaun bilaterál entre Repúblika Indonézia no Timor-Leste iha área komérsiu nian,” Mininistra Adaljiza Magno, hateten ba jornalista sira hafoin seremonia simu karta kredensiál hosi Embaixadór Indonézia foun mai Timor-Leste.

Tanba, Timor-Leste nia ekonomia liuliu sasán nesesidade bázika depende ka maioria importa hosi Indonézia.

“Ita bo’ot sira hatene sasán importadu barak liu maihosi Indonézia, tanba ne’e ita presiza tebes fortifika kooperasaun iha área komérsiu,” Governante ne’e afirma.

Prezidente Repúblika, Francisco Guterres Lú Olo, simu karta kredensiál hosi Embaixadór Indonesia iha Timor-Leste, Okto Dorinus Manik iha Palásiu Prezidente Nicolau Lobato, Bairru Pité. segunda (13/12). Imajen/Egas Cristovão

Iha ámbitu aprezentasaun karta kredensiál, Embaixadór foun ne’e hato’o mós ba Xefe Estadu kona -ba negosiasaun fronteira terrestre no marítima ne’ebé sei halo iha tinan oin. Tanba, situasaun pandemia globál ne’e halo negosiasaun fronteira terrestre pendente hela.

“Ita espera katak tinan oin ita bele tuur hamutuk fila-fali ko’alia kona-ba asuntu rua maritima no terrestre,” nia afirma.

Embaixadór Okto Dorinus Manik mós hato’o komprimentu hosi Prezidente Indonézia, Joko Widodo, ba nia omologu PR Lú-Olo.

“Ita nia Prezidente Repúblika kontente ho relasaun bilaterál Timor-Leste ho Indonézia, durante ne’e no ita hakarak kontinua relasaun ne’ebé maka iha,” nia informa.

Embaixadór foun ne’e mós fó ninia apresiasaun ba Timor-Leste nia esforsu hodi lta kombate COVID-19.

Jornalista : Natalino Costa

Editór       : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here