Komandu FALINTIL-Forsa Defeza Timor-Leste (F-FDTL) liuhosi Departamentu Saúde Militár hala'o tratamentu saúde gratuita ba komunidade aldeia Beacou (13/12). Imajen Tatoli/Francisco Sony.

BOBONARO, 12 dezembru 2021 (TATOLI) – Komandu FALINTIL-Forsa Defeza Timor-Leste (F-FDTL) liuhosi Departamentu Saúde Militár, segunda ne’e hala’o tratamentu saúde gratuita ba komunidade adeia Beacou, suku Aidabaleten, postu administrativu Atabae, munisípiu Bobonaro.

Adjuntu Xefe Departamentu Médiku Saúde Militár, Kapitaun Médiku Manuel Mendes Pereira, esplika, iha ezersisu Cobra 21-2 ne’e médiku militár nia tarefa serbisu maka apoia reál ba ezersísiu tomak.

Nune’e mós apoia ezersísiu ne’e tomak nomós ajuda umanitária hanesan halo tratamentu saúde ba komunidade sira. Aldeia Beacou iha xefe família hamutuk 160 ho totak populasaun 748. 

Adjuntu Xefe Departamentu Médiku Saúde Militár, Kapitaun Médiku Manuel Mendes Pereira. Imajen Tatoli/Francisco Sony.

Iha prosesu tratamentu ne’e rejista no halo triajen atu koko tensaun pasiente nian, nune’e mós halo tratamentu hosi doutór militár sira no ikusliu mak simu ai-moruk hosi doutór farmasístika relasiona ho moras ne’ebé komunidade sira enfrenta.

“Ai-moruk ne’ebé fó depende ba moras pasiente sira-nian, bainhira ulun moras nian fó ai-moruk ulun nian, karik ka infeksaun ruma ita fó aimoruk antibiótika,” Kapitaun Médiku Manuel Mendes Pereira, ko’alia asuntu ne’e bainhira hala’o tratamentu saúde ba komunidade iha aldeia Beacou, segunda ne’e. 

Kapitaun ne’e reforsa, iha prosesu tratamentu durante ne’e seidauk hetan komunidade ida enfrenta moras grave, kuandu identifika sei koordena ho sentru saúde sira-ne’ebé besik hodi trasfere kedas hodi halo tratamentu kontinuasaun.

Nune’e mós haree ba kondisaun, karik mak labele halo tratamentu iha sentru saúde sira-ne’ebé besik entaun transfere ba Hospital Nacional Guido Valadares (HNGV), Dili hodi halo tratamentu.

“Graça a deus durante ne’e la hetan ema ruma maka moras todan no serbisu hotu la’o di’ak no ami-nia koordenasaun ho sentru saúde sira ne’e la’o nafatin,” nia informa. 

Xefe aldeia Beacou, Sérgio Pedruco. Imajen Tatoli/Francisco Sony.

Xefe aldeia Beacou, Sérgio Pedruco, orgullu no apresia ho prezensa hosi FALINTIL-Forsa Defeza Timor-Leste (F-FDTL) ne’ebé halo tratamentu gratuita ba komunidade aldeia refere. 

“Hanesan autoridae lokál enkoraja komunidade sira atubele partisipa iha tratamentu gratuita ida-ne’e, karik balun iha moras ruma bele halo tratamentu kedas,” nia enkoraja.

Jornalista         : Francisco Sony

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here