Administradór Covalima, Francisco de Andrade, no Diretòr Servisu Munisípiu Agrikultura Covalima, Zeferino Guterres, hala’o lansamentu kuda batar Sele iha to’os ida iha área Sukabi Mesak-Suai Loro. Imajen Tatoli /Celestina Teles.

COVALIMA, 13 dezembru 2021 (TATOLI)—Administradór Munisípiu Covalima, Francisco de Andrade, husu ba grupu agrikultura tenke kuda batar no fó rezultadu hodi hasa’e produsaun batar. 

Administradór hato’o kestaun ne’e bainhira Servisu Munisipál Ageikultura Covalima hala’o lansamentu kuda batar Sele tuir Sistema Prátika Agrikultór Di’ak (PAD) epoka daruak 2021 iha aldeia Loro, suku Suai Loro, postu administrative Suai Vila, Munisípiu Covalima. Segunda ne’e.

“Ha’u fiar katak forma grupu inisiativa mai hosi ita-boot sira rasik, ami hakarak haree ohin halo lansamentu tenke iha rezultadu no ami mos hakarak mai atu koileta fali,” Francisco de Andrade hato’o liuhosi nia diskursu hafoin halao lansamentu kuda batar sele iha aldeia Loro, suku Suai Loro, postu administratsaun Sai Vila, Covalima, segunda ne’e. 

Bazeia ba esperiénsia ne’ebè mak iha, hafoin halo lansamentu kuda batak maibé bainhira atu kolleta batar laiha tanba animál mak estraga hotu, nune’e ho lansamentu kuda batar ba daruak ida-ne’e tenke fó rezultadu ne’ebè mak di’ak.

“Ita-nia Governu ajuda ita gratuita. Ita-boot sira tenke servisu makaas hodi fó rezultadu ne’ebè mak bele fó satisfasaun bae ma hotu,” nia hateten.

Administradór mós husu xefe suku sira atu kontinua identifika agrikultura sira hodi halo to’os, tanba rai Covalima hanesan rai-ne’ebè iha potensia atu halo to’os no natar maibé rai barak mak agora sei abandona.

“Hafoin ita ukun rasik an, ema barak mak lakohi halo to’os no natar, hein de’it subsídiu hosi Governu loloos. Ita iha konsiénsia tenke servisu makaas mak foin bele han hosi rezultadu kolleta, tanba iha era ukun an ita baruk atu halo servisu liu-liu halo to’o no natar,” nia hateten. 

Diretòr Servisu Munisípiu Agrikultura Covalima, Zeferino Guterres, enkoraja agrikultór sira iha Covalima atu kuda no kuidadu batar, nune’e bele fó rezultadu ne’ebè di’ak.

“Ohin ita mai hamutuk iha ne’e, ita asiste ita-nia grupu agrikultura sira hodi halo lansamentu kuda batar. Maske grupu hasoru situasaun defisil, maibé sira iha vontade nafatin hodi hala’o servisu,” nia dejan.

Administradór Covalima, Francisco de Andrade, no Diretòr Servisu Munisípiu Agrikultura Covalima, Zeferino Guterres, hala’o lansamentu kuda batar Sele iha to’os ida iha área Sukabi Mesak-Suai Loro. Imajen Tatoli /Celestina Teles.

Grupu agrikultura ne’ebè maka realiza atividade ida-ne’e, bazeia servisu Munisípio Agrikultura covalima ni’an oinsa atu hasa’e produsaun no produtividade Agrikultura liu-liu produsaun ba alimentár tanba ne’e fó apoiu mina gratuita no fini batar ho kilograma 250. 

“Ha’u enkoraja ba inan-aman sira kontinua badianas ho ita nia Administradór iha inisiativa atu akompaña buka dalan oinsa bele hadia ita nia moris liuhosi ita nia kna’ar hanesan Agrikultura,” nia tenik 

Lansamentu kuda batar ne’e lansa husi administradór munisípio Covalima hamutuk ho diretór munisípál, parseiru no grupu agrikultura sira mak hanesan Grupu susar hadomi ho nia membru hamutuk na’in-10 kompostu husi feto na’in-lima (5) no mane na’in-lima (5).

Jornalista : Celestina Teles

Editór       : Cancio Ximenes 

PUBLISIDADEiklan

HAKEREK NO HATÁN

Please enter your comment!
Please enter your name here