Komunidade iha área BTM Fatuhada hahú infrenta Inundasaun. Imajen/ Natalino Costa.

DILI, 12 dezembru 2021(TATOLI)— Udan bo’ot ne’ebé akontese iha tuku 15:00 otl, domingu loraik ne’e, rezulta inundasaun ka bee hahú tama komunidade nia uma iha área  BTM, suku Fatuhada, postu administrativu Dom Aleixo, munisípiu Dili.

“Udan ne’e hamosu inundasaun tanba be’e tama ami nia uma no to’o ona ain tuur. Tanba ne’e ami evakua ona hosi uma hodi ba buka fatin seguru, liuliu ami salva hela ami nia dokumentu, ropa no ai-han balun de’it,” Komunidade Fatuhada BTM, Aleixo da Silva, hateten ba Agência TATOLI, domingu ne’e.

Iha domingu ne’e, udan ho intensidade boot halo família balun iha kapitál Dili hahú enfreta ona inundasaun ka bee tama uma.

“Inundasaun ne’e ita la espera, maibé nuudar ema tenke esforsu rasik hodi prevene rasik tanba udan ida agora bainhira maka atu para ita la hatene, nune’e ita maka tenke buka salva ita nia aan,” nia akresenta.

Iha fatin hanesan, Celestino de Jesus, informa, udan bo’ot ne’ebé akontese lori tristeza ba nia, tanba nia uma bee sempre tama no nakonu hela deit.

Bee nalihun iha uma komunidade. Imajen/ Natalino Costa

“Ita hatene mota ki’ik ne’e kuandu udan bo’ot nakonu lalais tanba laiha bee dalan propriu  atu bee suli ba , entaun tenke tama ami nia uma,” dehan nia ho triste.

Xefe suku Fatuhada, Marcelino Soares, husu ba família ne’ebé iha fatin risku atu kontinua kuidadu aan no inan-aman sira kontrola oan sira iha tempu udan.

“Husu ba inan aman atu kontrola no asegura oan sira mantein iha uma, labele lori lao udan laran no lao ba mota”, Nia fó-hanoin.

Daudaun ne’e, nia observa udan ho intensidade bo’ot ne’e konserteza fó risku ba komunidade sira enfreta inundasaun.

“Ha’u hanoin buat sira hosi Protesaun Sivil alerta ona ita tenke halo tuir,” Xefe Suku ne’e fó hanoin.

Tuir observasaun jornalista TATOLI iha tereñu nota katak komunidade sira iha área BTM Fatuhada hahú hamoos uma laran tanba bee nalihun makas iha uma-laran no balun buka asegura hela sasan importante sira, nune’e be’e labele hoban.

Aliende ne’e, família balun hahú sai hosi nia hela fatin ba sira nia família sira hodi asegura aan iha fatin seguru.

Jornalista : Natalino Costa

Editór        : Florencio Miranda Ximenes

PUBLISIDADEiklan