Administradór Diosezanu Dioseze Baucau, Padre Alípio Pinto Gusmão. Imajen TATOLI/Natalino Belo

BAUCAU, 11 dezembru 2021 (TATOLI)–Administradór Diosezanu Dioseze Baucau, Padre Alípio Pinto Gusmão, enkoraja sarani Dioseze Baucau atu hahú moris foun hafoin selebra misa loron-40 falesimentu Dom Basílio do Nascimento.

“Ita sente lakon, tama iha momentu ne’ebé susar no difisil, maibé loron-40 konvida ita atu hahú vida foun, ne’ebé importante ba ita Dioseze Baucau no família tomak atu koko halo memória, maibé iha espransa katak hafoin mate iha moris hias no tama iha lalehan,” Admistradór Diosezanu Dioseze Baucau, hateten, iha Igreja Katedrál, Villa antiga, sábadu ne’e.

Tuir Padre, selebrasaun loron-40 tuir bíblia iha novu testamentu, Jesus mate hafoin loron-40 sae ba lalehan, nune’e tuir loloos selebrasaun ne’e la’ós hanoin Dom Basílio nia mate, maibé koko hanoin Saudozu tama ba lalehan.

Nune’e, lisaun ne’ebé apreende hosi loron-40 mak papél Dom Basílio nia muda hosi mundu, hafoin durante tinan-25 lidera Dioseze Baucau no akompaña diretamente liuhosi hahalok no liafuan, maibé hafoin Amu Bispu mate, ninia papél muda fali iha lalehan no reza ba sarani sira.

Notísia relevante: Sarani Dioseze Baucau selebra misa loron-40 falesimentu Dom Basílio

Seluk, sarani sira bainhira reza, hateten Dom Basílio nu’udar Aman iha lalehan, nune’e agora bainhira Aman laiha, maibé haree malu hanesan maun no alin nafatin.

Tanba ne’e, tuir Padre Alípio, knaar ne’ebé nia asume nu’udar Administradór Diosezanu Dioseze Baucau hanesan João Baptista ne’ebé prepara Mesias mai, katak prepara Bispu foun lidera hikas Dioseze Baucau.

“Hau nia apelu, konvite mai ita hanesan maun no alin hamutuk iha Uma-kreda lokál Dioseze Baucau nian,” Padre Alípio dehan.

Biban ne’e, Amu hato’o agradese ba komisaun organizadora, hahú iha prosesu funerál ne’ebé lidera hosi Padre Parokia Pároku Santo António villa antiga, ne’ebé fó-an servisu hodi prepara kondisaun to’o iha misa loron-40 no sei kontinua to’o tinan ida.

Misa loron-40 falesimentu Dom Basílio partisipa hosi Autoridade lokál sivil no Militár, família, Padre no Madre sira, Relijiosu no sarani Dioseze Baucau.

Jornalista : Natalino Belo

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here