Manán-na’in prémiu direitu umanu Sérgio Vieira de Mello hasai retratu hamutuk ho Prezidente Repúblika, Francisco Guterres Lú Olo, hafoin simu prémiu hosi Prezidente Repúblika iha komemorasaun loron mundiál direitu umanu, iha Palásiu Prezidénsiál Nicolau Lobato, Bairru Pite, Dili, sesta (10/12). Imajen/Mídia PR.

DILI, 11 dezembru 2021 (TATOLI)—Iha loron mundiál direitu umanu ne’ebé selebra kada loron 10 dezembru ne’e, Prezidente Repúblika dedika espesialmente atribuisaun Prémiu Direitu Umanu hodi fo omenajén ba saudozu Sérgio Vieira de Mello ne’ebé espesiál tebes ba Timor-Leste no fó an tomak ba kauza direitu umanu no pás. 

Notísia Relevante: Aban, PR sei atribui prémiu “Sergio Vieira de Mello” ba manan-na’in sira

Prezidente Repúblika, Francisco Guterres Lú Olo, hateten atribuisaun Prémiu Direitu Umanu Sérgio Viera de Mello hodi konsidera sosiedade sira-ne’ebé proteje no promove direitu umanu ba ema hotu mak sira-ne’ebé reziliente no sustentavel liu, no hamriik firme iha situasaun defisil sira-ne’ebé ita la espera hanesan pandemia COVID-19 no impaktu sira hosi situasaun oioin hanesan menus fasilidade no laiha kondisaun mínimu hodi hala’o servisu.

Tanba ne’e, Prezidente Repúblika hato’o parabéns ba manan-nain sira no sira-nia família tomak ne’ebé sempre apoia sira iha momentu defisil sira tanba manán-na’in sira mak sai hanesan portadór direitu umanu no sai éroi ba dezenvolvimentu nasionál.

“Parabéns ba manan-naín sira! Ha’u haksolok ho imi-nia prezensa iha serimónia ida-ne’e hodi simu Prémiu ne’ebé imi foin manan no liu-liu, ita hotu bele koñese di’ak liután imi-nia atividade no rekuñese imi-nia servisu no valór no impaktu ne’ebé imi iha ba hametin fundamentu sira direitu umanus iha ita-nia rain. Imi mak portadór ba direitu umanu no nu’udar eroi iha prosesu dezenvolvimentu nasionál,” Prezidente Repúblika, Francisco Guterres Lú Olo, hateten iha ninia diskursu iha serimómia atribuisaun Prémiu Direitu Umanu Sérgio Vieira de Mello, liuhosi komunikadu imprensa ne’ebé Agência Tatoli asesu, sábadu ne’e. 

Nune’e mós, Prezidente Repúblika hato’o obrigada ba servisu no apoiu tomak ne’ebé Konsellu Agrasiamentu no Ordem Onorífika fó ba Prezidente Repúblika iha prosesu selesaun ida-ne’e to’o mai faze atribui prémiu ba manán-na’in sira iha loron ohin.

Prezidente Repúblika, Francisco Guterres Lu Olo, entrega
prémiu direitu umanu Sérgio Vieira de Melo ba manán-na’in sira. Imajen/Mídia
PR.
Prezidente Repúblika, Francisco Guterres Lu Olo, entrega
prémiu direitu umanu Sérgio Vieira de Melo ba manán-na’in sira. Imajen/Mídia
PR.

“Ha’u hein katak ho Prémiu ida-ne’e bele motiva liután imi hotu hodi kontinua imi-nia servisu ho kompromisu no ho haksolok nafatin iha imi-nia atividade loro-loron nian. Ho imi hotu nia serbisu no esforsu, ha’u hein katak bele sai hanesan ezemplu no modelu ba sidadaun sira seluk hodi bele kontribui ba hametin Direitu Umanu, iha konjuntura foun ida-ne’e hodi hatutan luta ba dezenvolvimentu ita-nia rai no ba ita-nia ema sira nia moris di’ak,” Prezdente Repúblika hateten

Kada tinan Prezidente Repúblika atribui Prémiu Direitu Umanu Sérgio Vieira de Mello ba kategoria rua mak Direitos Civis e Políticos ne’ebé konsidera sidadaun ka organizasaun ne’ebé promove, defende no divulga direitu umanu ne’ebé rekuñese iha mundu tomak iha ámbitu direitu sivíl no direitu polítiku nian.

Kategoria seluk mak Direitos económicos, Sociais e Culturais, ne’ebé konsidera organizasaun ne’ebé hala’o atividade atu promove, defende no divulga direitu umanu iha área sosiál, direitu ekonómiku no direitu kulturál, liu-liu kombate ki’ak, dezenvolve setór edukasaun, saúde, protesaun meiu-ambiente solidariedade no inkluzaun sosiál.

Iha tinan ida-ne’e, Prezidente Repúblika simu hamutuk kandidatu na’in (26). Kandidatu na’in-hitu (07) hosi kategoria Direitos Civis e Políticos no kandidatu na’in17 hosi kategoria Direitu Económico, Social e Cultural.

Manán-na’in prémiu direitu umanu Sérgio Vieira de Mello hamutuk ho família hasai retratu hamutuk ho Prezidente Repúblika, Francisco Guterres Lú Olo, hafoin simu prémiu hosi Prezidente Repúblika iha komemorasaun loron mundiál direitu umanu, iha Palásiu Prezidénsiál Nicolau Lobato, Bairru Pite, Dili, sesta (10/12). Imajen/Mídia PR.

Liuhusi prosesu selesaun, Konsellu Agrasiamentu no Ordem Onorífika halo verifikasaun ba kandidatura hotu, vizita kandidatu sira-ne’ebé liu selesaun dokumentasaun nian, entrevista sira ho sira-nia proponente no komunidade sira, akompaña sira-nia servisu to’o ikus selesiona kandidatu nain-neen (6), indivídu na’in-rua (2) no organizasaun naun-governamentál ida (1), no grupu orfonatu ida (1) nu’udar manan-na’in ba Prémiu Direitu Umanu Sérgio Vieira de Mello ba tinan 2021.

Maibé, kandidadtu ba kategoria direitus civis e politico laiha ida mak selesionadu tanba la prenxe kriteriu inklui mós, na’in-rua (2) hosi kategoria Direito Economico, Social no Cultural.

Iha tinan ida-ne’e Premiu Direitus Umanus, Sergio Viera de Mello atiribui deit ba katerogia ida mak Direitos Sociais, Económicos e Culturais manan-na’in sira mak Alexandre Rosa Bruno Sarmento husi Laclubar, Soibada; Paulina da Costa Soares hosi Uatulari, Viqueque; Orfonatu Dominikana Bidau, Dili; no Casa Vida Centru de Cuidadu á Criança, Dili.

Alexandre Rosa Bruno Sarmento

Manan-na’in Alexandre Rosa Bruno Sarmento, hanesan defensór ba ambiente no floresta iha postu administrativu Laclubar no Soibada.

Alexandre hala’o aktividade Carbon Offset ka Sekuestru Karbonu, hosi atividade ne’e mak fó apoiu ba to’os-na’in sira hetan benefisiu finanseiru hodi hadi’a sira- nia rendimentu no ekonomia uma kain nian.

Alexandre la’ós de’it halo servisu iha área meiu ambiente nian maibé halo mós servisu sosiál sira hanesan halo mobilizasaun ba rekursu finanseiru hodi fó apoiu ba Estudante sira liuhosi bolsu estudu iha nivel sekundáriu no nivel ensinu superiór iha Dili.

Nia mobiliza mós rekursu no finanseiru hodi halo konstrusaun eskola sekundária iha Laclubar no eskola Pré-Eskolar iha Muachau iha Tutuala ne’ebé ikus mai sai melhor pré-eskolar iha Munisípiu Lautém.

Area Servisu liga ba meiu-ambiente no edukasaun ba estudante iha área remota hanesan Laclubar, Soibada no Tutuala.

Atu garante sustentabilidade aktividade ne’ebé halao ona desde 2009, Alexandre funda ONG ho naran Fundasaun Carbon Offset Timor (F-COTI) ho atividade no nian rezultadu konkretu mak hanesan kuda ai-oan hamutuk 250,000 no moris hamutuk ai-oan 220,000 iha to’os hamutuk 212 ho ektare 197-resin.

Tipu ai-oan ne’ebé nia kuda mak hanesan mahoni, teka metan no mutin, ai-saria, ai-kakeu no ai-fuan sira hanesan diospiros, nespra, sabraka no seluk tán.

Durante ne’e, nia kuda ona ai parapa hamutuk 22,000, besik ektare haat (4) iha Wenunuc, Metinaro. To’o oras ne’e, nia selu ona to’os-nain sira ho montante $180.000 iha Soibada, Laclubar, Viqueque, Liquiçá, no Metinaro.

Nia involve ona 212 uma kain no to’os-na’in individuál besik 1,500 iha projetu karbonu kreditu.

Nia fó bolsu estudu ba estudante sekundaria katolika Laclubar hamutuk ema 600-resin hahú hosi tinan 2011 to’o agora no estudante universitáriu hamutuk 13 iha Dili, ni nia mós estabelese programa mikro kreditu ba Feto Rurál sira.

Orfonatu Dominikana Bidau

Orfonatu Dominikana Bidau, Dili mak Kongregasaun Irmãs Missionárias Dominicanas do Rosario Timor-Leste, loke uma mahon ka edukasaun ka orfonato ba labarik oan-ki’ak sira (inan/aman mate) hosi nivel ensinu pre-eskolár to’o nivel ensinu superió dezde tinan 2005 to’o agora.

Orfonatu ne’e fó ajudu ba labarik ona-ki’ak sira atu asesu ba edukasaun informál, formal no naun formal. Edukasaun Informál mak hanesan hanorin labarik atu respeita an no ema seluk nu’udar ilas (lalatak) Maromak nian, hadomi maun alin sira, pontuál ba atividade hotu, kuidadu ambiente.

Edukasaun Formál mak asiste labarik sira hodi halo rejistrasaun ba eskola, selu sira-nia propinas, fasilita osan transporte, fotokopia no kontrola sira-nia atitude ho mestre sira iha eskola, fornese nesesidade baziku.

Edukasaun Naun Formál mak fó klase lian Inglés no Portugéz, toka viola no piano, múzika, fahe Maromak nia liafauan, suku hena, kursu komputadór baziku no palestra.

Casa Vida Timor-Leste

Casa Vida Timor-Leste nu’uudar organizasaun non-lukrutivu, harii iha tinan 2008, hodi oferese fatin seguru ba labarik no feto foinsa’e sira-ne’ebé sai vitima ba violénsia oioin. Casa Vida fó asisténsia, protesaun, no kuidadu apropriadu ba vitima sira-nian moris fiziku, mentál, sosiál no moris espirituál. Casa Vida oferese servisu hodi promove Feto Foinsa’e sira atu prepara sira-nia an hodi bele hili servisu ho di’akliu ba sira-nia moris tuir sira ida-idak nia kapasidade no abilidade.

Casa Vida hatudu ona ninia prestasaun serbisu ho kualidade. Serbisu sira oferese Uma Mahon Seguru ho asisténsia iha aspetu hotu-hotu ba vitima sira no inklui apoiu nesedidade báziku ho kualidade.

Servisu lubuk ida mak Casa Vida hala’o ona hanesan kapasitasaun hodi dezenvolve LIFE SKILL, fasilita formasaun no vokasaun iha área oioin hanesan tein hahan, artezenatu, kursu komputadór inklui fasilita labarik sira asesu ba edukasaun formál no non-formál.

Casa Vida halo servisu re-Intregrasaun (Vítima fila fali ba família, komunidade no Sosiedade no kontinua fahe informasaun kona-ba prevensaun violénsia bazea ba jéneru. Casa Vida nu’udar fatin seguru ba labarik no feto foinsa’e iha tempu susar no sei kontinua reafirma sira-nia prontidaun hodi halo servisu sira-nee. Casa Vida forma joven sira-ne’ebé perpara hahan ho kualidade no nutritivu tebes.

Paulina da Costa Soares

Manan-na’in Paulina da Costa Soares nu’udar parteira ne’ebé destaka iha postu saúde Nunumalau no Haenaudere, suku Afaloikai, postu admininstrativu Uatulari, Viqueque dezde 2006 hafoin ramata estudu iha UNTL to’o ohin loron.

Postu Saude Nunumalau lokaliza iha foho Matebian hun ho distánsia kilómetru 15 hosi Sentru Saúde Uatulari Vila ba Postu Nunumalau.  Bainhira atu foti ai-moruk iha Sentru Saúde Uatulari, nia uza kuda hodi foti ai-moruk sira. Nia hela iha Dasuati no loro-loron ba servisu la’o ain ho distánsia kilómetru 4,5, hakuur mota rua, tuun-sa’e foho hodi to’o iha postu refere.

Tanba dedikasaun servisu no vontade hodi tulun família ka komunidade kbiit laek sira, nune’e Paulina la sura no lasente kolen hodi halo servisu hirak ne’e. Tinan 2019, Paulina simu tan responsablidade hodi servisu iha postu saúde Haenaudere.

Iha postu saude Nunumalau, Paulina halo tratamentu saude ba komunidade sira iha suku Babulu, Afaloikai, Vessoru no Matahoi sorin. Postu Saude Haenaudere kobre suku Afaloikai Uatucarbau sorin, Afaloikai Baguia sorin, no Afaloikai Uatulari. Maske nudar feto la hamihis servisu no didikasaun Sra. Paulina nian ba nia maluk sira ne’ebé persiza tebes nia tulun iha área saúde.

Dezde tinan 2008, Laureadu Nobél da Paz, José Ramos Horta, Prezidente Repúblika inisiativa ka establese Prémiu Direitu Umanu Sérgio Vieira de Mello ne’ebé atribui ba sidadaun ka organizasaun governamentál ka la’ós governamentál, hosi Timor-Leste ka hosi país seluk, ne’ebé halo promosaun, protesaun no divulgasaun Direitu Umanu iha Timor-Leste.

Jornalista : Nelson de Sousa

Editór      : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here