Komandu Falintil-Forsa Defeza Timor-Leste (F-FDTL) liuhosi ekipa médiku militár hala’o tratamentu saúde gratuita ba komunidade sira, iha suku Hataz, postu administrativu Atabae, sesta (10/12). Imajen Tatoli/Francisco Sony.

BOBONARO, 10 dezembru 2021 (TATOLI) – Komunidade suku Hataz, postu administrativu Atabae, munisípiu Bobonaro, entuziasmu simu tratamentu saúde gratuita hosi médiku militár FALINTIL-Forsa Defeza Timor-Leste (F-FDTL).

“Ohin komunidade sira entuziasmu tebes hetan tratamentu hosi médiku militár sira. Tanba komunidade rona informasaun katak, médiku militár hosi FALINTIL-Forsa Defeza Timor-Leste (F-FDTL) inklui doutór espesialista sei mai halo tratamentu gratuita. Hanesan pesoál saúde ne’ebé responsável ba postu saúde Aidabasalala ida-ne’e sente kontente tanba ohin loron médiku militár mai ami-nia le’et hodi halo tratamentu ba komunidade sira,” Médika Jerál Élia da Costa ko’alia iha sentru saúde Aidabasalala, sesta ne’e. 

Durante fulan-abríl to’o loron 6 dezembru 2021 iha suku Hataz halo vasinasaun doze primeiru nian ema hamtuk 883 no doze segundu iha 600-resin. Totál alvu ne’ebé maka Ministériu Saúde fó mai ami atu atinje iha suku Hataz iha 1.215. 

Médika Jerál, postu saúde Aidabaslala, duku Hataz, Élia da Costa. Imajen Tatoli/Francisco Sony.

“Kuaze ema 300 maka seidauk simu vasinasaun no ho prezensa médiku militár halo komunidade balun konsege mai simu tán vasinasaun doze primeiru no segundu nian,” dehan médika jerál ne’e.

Iha postu saúde Aidabaslala ne’e ekipamentu no ai-moruk sei sufisiente atubele atende komunidade sira-nia problema.

“Durante tinan-ida ona pesoál parteira maka laiha no ami iha-ne’e pesoál infermeiru na’in-ida, saúde públiku nain-ida no médiku ida hamutuk ami na’in- tolu inklui cleaner ida,” nia katak.

Iha parte seluk, komunidade Suku Hataz Martina Marques, sente kontente tanba médiku militár hosi F-FDTL halo tratamentu ba moras oinoin. 

Komunidade Suku Hataz, Martina Marques. Imajen Tatoli/Francisco Sony.

“Ami agradese ba médiku militár F-FDTL nian tanba ohin loron konsege to’o duni ami-nia fatin hodi halo tratamentu saúde,” nia orgullu. 

Postu saúde Aidabaslala ne’ebé lokaliza iha suku Hataz ne’e rejista asliu maka inspesaun respiratória tanba iha fulan-novembru nia laran ne’e rejista mane na’in-15 no feto na’in-25. Suku Hataz iha aldeia haat hanesan aldeia Adabaslala, Aidabalete, Boloi no Bia Marae.

Jornalista         : Francisco Sony

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here